Arabako hainbat kuadrillatako futbol klubek hartuko dute parte Arabako Futbol Federazioak sustatuko ‘Gurekin bat’ ekimen pilotuan. Proiektuarekin aniztasun funtzionala duten pertsonen partaidetza sustatu nahi dute futbolean, Araba osoan. Ekimenean parte hartuko duten kirol klubek haur eta kadete kategorietako taldeak izan behar dituzte eta teknikariak jarri behar dituzte Federazioaren esku jarduera programan parte har dezaten.
Ekimenak helburu bikoitza du. Alde batetik, klubeko teknikariak aniztasun funtzionalean formatzea (besteak beste, nolakoa izan daitezkeen eta nola egokitu kirol jarduerak); eta, bestetik, hautatutako maila bakoitzarekin (haurrekin edo kadeteekin) entrenamenduak egitea aniztasun funtzionala duten pertsonak egokitzera bideratuta. Ariketak Arabako Federazioko entrenatzaile eta hezitzaileek prestatu eta emango dituzte, dinamikan parte hartzen duen klubeko entrenatzaileen laguntzarekin.
Arabako hainbat zelaitan egingo dira entrenamenduak. Lehena urtarrilaren 24an izango da Adurtzabalen eta bigarren saioa Ellakuriko zelaian egingo dute, otsailaren 26an 10:00etatik 13:00etara.
'Gurekin bat' ekimena Arabako Futbol Federazioak sustatutako proiektu pilotua da eta Arabako Foru Aldundiaren eta Vital Fundazioaren laguntza jaso du. Kolaboratzaileen artean, Apdema, Down Araba-Isabel Orbe elkartea, Arabako Kirol Egokituaren Federazioa, Arabako Autismo Elkartea, Kulunka, Tel Euskadi, Talur, Arabarnee, Aspasor eta Azirkarte erakundeak daude.