Jose Matia, Maestro Elorza eta Zubiko Kurajo kaleetako bizilagunek zaborra jasotzeko sistema pneumatikoa erabili ahalko dute aurki. Villosako zubi berriak Nerbioi ibaiaren eskumaldea eta zaborra biltzeko zentroaren arteko lotura egitea ahalbidetu du. Horretarako, 800 metroko tutua baliatu dute.
Honezkero hasi dira sistema pneumatikora egokitutako edukiontziak instalatzen. 25 edukiontzi jarriko dituzte orotara ibaiaren eskumaldeko hiru kaleetan, zazpi gunetan. Edukiontzi berriekin batera, beira eta bigarren eskuko objektuak uzteko edukiontziak mantenduko dituzte ere.
Laudioko Udalak 2022ko aurrekontuetan sartu zuen sistema pneumatikoa zonalde honetan instalatzeko partida; 190.000 euro orotara. Aurreikuspenen arabera, udaberri hasieran egongo dira edukiontziak erabilgarri.
Zaborra biltzeko sistema pneumatikoa 2009an instalatu zen Laudioko erdigunean, Nerbioi ibaiaren ezkerraldean. Hasierako inbertsioa 6,6 milioi eurokoa izan zen. Udalaren asmoa da datozen urteetan Lateorron ere edukiontzi sistema hau jartzea.