Espainako Areto-Hockey Txapelketa finalaurrekoen fasean dago murgilduta bete-betean, eta Laudio izango da lehia horren epizentroetako bat. Ganbegi Hockey taldearen ekimenez asteburu osoko txapelketa antolatu dute La Granja polikiroldegian. Gaur egin dute goi-mailako hitzordua aurkezteko prentsaurrekoa Laudioko udaletxean. Bertan izan dira Ana del Val kirol diputatua, Ander Añibarro Laudioko alkatea, Alvaro Zabala Espainiako Hockey Federazioko ordezkaria, Agustin Rojo Euskal Hockey Federazioko lehendakaria, Iñaki Olaguenaga Ganbegi Hockey Taldeko idazkaria eta Hectro Borge Arabako Hockey Federazioko lehendakaria.
ARETO-HOCKEYA | Espainiako Areto-Hockey Txapelketako finalerdiak jokatuko dira Laudion otsailaren 3tik 5era.
— Aiaraldea.eus (@aiaraldea) January 31, 2023
Goi-mailako kirol hitzorduaren nondik norakoak eman dizkigu Hector Borge Arabako Hockey Federazioko lehendakariak pic.twitter.com/8k9GTtVkLx
Asteburu bete Hockey
Ganbegi Hockey Taldearekin batera beste zazpi klub arituko dira finalerako txartelaren bila norgehiagokan: Madriletik etorritako Complutense eta Club de Campo; Andaluziako Benalmádena eta Alcalá; Xixoiko Covadonga; Santanderreko Sardinero; eta, azkenik Alicanteko Unibertsitateko Atletico San Vicente Hockey Taldea. Lehia bizia irgarri dute antolatzaileek.
Talde laudioarrak dituen aukeren inguruan galdetuta ikuspegi errealistarekin azaldu da Iñaki Olaguenaga: "Talde zaila egokitu zaigu, Complutenseren aurka aritu beharko gara, areto-hockeyko Espainiako txapelduna. Kontuan hartu behar da ere ohorezko-mailan dauden taldeak direla guztiak, eta guk, aldiz, lehenengo mailan jokatzen dugu ohikoan".
Orotara 18 partida daude aurreikusita. Ostiral eta larunbatean zortzina partida programatu dituzte, goizeko 10:00etatik hasita 20:30ak arte. Igandean finalak jokatuko dira
Ostiraletik hasita igandera arte luzatuko da finalaurreko fasea. Orotara 18 partida daude aurreikusita. Ostiral eta larunbatean zortzina partida programatu dituzte, goizeko 10:00etatik hasita 20:30ak arte. Igandean finalak jokatuko dira, 11:30ean eta 13:00etan. Ordutegi zehatzak eta partiden emaitzak Espainiako Federazioko web orrian kontsultatu ahalko dira unean une. Aurreikuspenen arabera 150 kirolari baino gehiago bertaratuko dira. eta antolatzaileek kiroldegiko harmailak "jendez-lepo" ikustea espero dute.
Finalaurrekoa Laudion antolatzea Ganbegi taldeak egindako "apustua" izan dela azaldu du Iñaki Olaguenagak: "Aukera genuen, txapelketa beste nonbaiten jokatzeko, baina nahiago izan dugu inbertsioa egin, eta finalaurrekoa Laudiora ekartzea". Finalaurrekoaren antolakuntza klubaren urteko aurrekontuaren heren bat dela aitortu du Olaguenagak. "Esfortzuak merezi izan du, Hockeya suspertzeko eta baita eskualdeari bultzada ekonomikoa emateko ere", azpimarratu du Ganbegi taldeko idazkariak.
Hockeya indartzeko apustua
"Gure helburua goi-mailako kirol ekitaldi bat antolatzea izan da, Aiaraldean hockeya sustatzen jarraitu ahal izateko", azaldu du Hector Borgek. "Erronka handia izan da guretzat. Asko izan dira urte luzez Arabako Federazioak Euskal Federazioarekin elkarlanean antolatu ditugun goi-mailako hitzorduak, eta horri eutsi nahi izan diogu berriro ere". Horrelako egitasmoekin aurrera jarraitzeko asmoa adierazi dute Federaziotik, Hockeya eskualdean eta ikastetxeetan promozionatzen jarraitzeko helburuarekin.
Izan ere, Hockeyan erreferente oso ezaguna izan da Laudio. Gaur egun desagertuta dagoen Arabatarrak taldea eta baita Ganbegi taldea Espainiako Hockey txapeldun izatera iritsi ziren, emakumezkoen ligan. "Laudiok merezi duen aitortza eta lekua berreskuratu nahi dugu", aldarrikatu du Olaguenagak, "horrelako hitzorduek bide horretan urratsak emateko aukerak eskaintzen dizkigu". Hockeyak Laudion utzi duen arrastoaren isla izango da kiroldegian bertan antolatu duten argazki erakusketa, finalaurrekoak iraun bitartean ikusgai egongo dena.
Bide horretan eskola-kirola indartzeko beharra azpimarratu dute Hockey federazioetako ordezkariek, Ana del Val diputatuak eta Ander Añibarro alkateak. Azpimarra berezia egin dute neskak eskola-kirolera erakartzeko ahaleginean, eta bide horretan konpromisoak hartzen jarraituko dutela azaldu dute.