Laudio Padel Klubak adierazi duenez, Gardeako pistak erreserbatzeko sistema aldatuko da otsailaren 6tik aurrera. Orain arte, astelehenetan jendetza batzen zen 9:00etan bertan, telefonoz edo presentzialki eskatu behar baitziren kirola praktikatzeko pistak.
Datorren astelehenetik aurrera, ordea, online ere egin ahalko dira erreserbak. Hori horrela, ordu eta erdiko iraupena izango da muga, eta 15:00etatik 15:30era arteko tartea ezingo da eskatu. Ildo beretik, derrigorrezkoa izango da argindarra ere alokatzea 17:00etatik aurrerako erreserbetan, martxoaren 31 bitarte.
Bazkideek astebete lehenago egin ahalko dituzte erreserbak, eta gainerakoek 24 ordu aurretik bakarrik
Pertsona bakoitzak erreserba bakarra bete ahalko du astero, orain arte bezala. Behin erreserba eginda, pistaren eskuragarritasuna blokeatu egingo da, baina ordainketa egin arte ez da prozesua amaitutzat emango. Orain arte gisa, banku transferentzia egin beharko dute interesdunek, eta gardea@laudio.eus helbidera bidali beharko dute ordainagiria ondoren, "edo erreserba momentutik 24 ordura Gardeako kirolgunean eskura ordaindu".
Laudioko Udalak argitu duenez, astelehenero 9:00etan (Gardeako kirolgunearen irekiera orduan) pilatzen zen eskaera eta jendetzari irteera ematea izan da ekimenaren xedea.