Aste honetan Aiala Vidrioko zuzendaritzak berretsi dio langile batzordeko ordezkariei 70 eta 91 langileren arteko irteera lortzen saiatuko dela urtarrilaren 2025erako.
Izan ere, errentagarritasun eta ekoizpen arrazoiak argudiatuta, konpainiak hiru laberekin beharrean birekin baino ez du lan egin nahi. Sindikatuei adierazi dionez, irteera guztiak adostuak eta boluntarioak izango dira.
91 irteera boluntarioak lortuko balitu, enpresaren langileen kolektiboa %27,5an murriztuko litzateke
Gauzak horrela, 331 langile izatetik, 240 izatera igaroko litzateke beira ekoizten duen enpresa. Hau da, %27,5 murriztuko luke behargin taldea.
Zuhurtzia sindikatuen aldetik
Momentuz, sindikatuek ez dute baloraziorik egin nahi, informazio faltagatik. Berez, 2021eko irailean jakinarazi zien konpainiak asmo hori, baina aste honetara arte ez du berriro gaia mahai gaineratu.
Langileen ordezkariek otsailaren 13an izango dute beste bilera bat zuzendaritzarekin eta espero dute bertan informazio gehiago jasotzea. Printzipioz, zazpi eredu ezberdin proposatuko ditu konpainiak irteera adostuak lortzeko, baina ez dakite askoz gehiago.
Horrez gain, sindikatuek jakin nahi dute zein izango den plana Aiala Vidrio ez bada heltzen 70 eta 91 langileen arteko langa horretara.