España una, Portugal cero. Memorias de un prisionero de guerras dokumentala estreinatuko dute ostiral honetan Orbeko Etxean, 20:00etan.
Filma AP-68 zinema kolektiboak (Euskal Herriko eta Aragoiko kideek osatutakoa) sortu du eta Javi Gil laudioarrak egin ditu zuzendari lanak. Horrez gain, Izaskun dek Cerrok egin du musika.
Gilekin batera, Santi Ric zaragozarrak hartu ditu zuzendaritza lanak: "Hilabete osoa igaro dut Orbeko Etxean Javirekin buru-belarri dokumentalean lanean, astelehenetik igandera, dena bukatu ahal izateko".
Istorio bitxia dokumentalaren atzean
Pelikularen protagonista Jose Ric Derne da, Santi Ricen senidea, hain zuzen. "Nire abizena oso arraroa da. Behin hasi nintzen bilatzen horri buruzko informazioa eta topatu nuen Ric gehiago zeudela Bolivian. Antza, gerra hasi zenean, familiaren adar batek Frantziako Estatura ihes egin zuen eta beste batek Boliviara. Boliviako senideekin harremanetan jarri eta Jose Ric ezagutu nuen. Okzitaniako Tolosan bizi da eta bizitza harrigarria izan du", azaldu du Santi Ricek.
Bere abizenari buruz ikertzen ari zela, Santi Ric konturatu zen ezagutzen ez zuen familiaren adar batek ere ihes egin zuela gerra zibiletik
Hori dela eta, Tolosaraino jo zuen eta elkarrizketa egin zion. Irratsaio bat egiteko bazen ere, bideoz jaso zuten eta hori izan da abiapuntua filmerako.
Orwellen miliziano zutabe berean
Solasaldi horri esker Jose Ricen bizipen ugariren berri izan zuen: "11 urterekin errepublikaren aldarrikapenean parte hartu zuen eta bere anaiaren bidez George Orwellen miliziano zutabean parte hartu zuen, gero Frankismoaren preso izan zen eta beranduago nazien kontzentrazio esparru batean amaitu zuen".
AP-68ren lehen lan dokumentala
Lan neketsuaren ondoren, ostiralean 47 minutuko dokumentalaren bertsioa estreinatuko dute Laudion. Hurrengo emanaldia Zaragozan izango da zinema batean eta gero proiekzioak egin nahi dituzte Jose Ricek bisitatutako herrietan, baita Tolosan ere.
"Josek pelikula ikusi du dagoeneko eta pozik dago emaitzarekin", aipatu du Santi Ricek.
Beste bertsio bat egin dute, 40 minutukoa, jaialdietan eta lehiaketetan parte hartzeko. Ibilaldi hori amaitu arte ez da Interneten ikusgai izango. Hortaz, Orbeko Etxekoa izango da ikus-entzunezkoa ikusteko aukera egokia.
Hau izan da euskaldunek eta aragoiarrek egindako lehen lana fikziozkoa ez dena eta gogoko izan dute. Hala eta guztiz ere, zenbait pasarte birsortu dituzte. "Gerrako pasarte bat grabatu dugu Alcubierreko lubakietan El Comité kolektiboarekin, eta baita beste leku batzuetan ere", argitu du Santi Ricek.