Aurrera doa Laudioko erdigunea uholdeetatik babesteko “proiektu definitiboa”. Uraren Euskal Agentziak abiatu du egitasmoa, Eskualde Garapeneko Europako Funtsen 4,7 milioi euro baliatuta. Behin obrak hasita, 17 hilabete beharko dituzte lan guztiak amaitzeko.
Helburu nagusia izango da Nerbioi ibaiaren tarte handi baten sekzio hidraulikoa handitzea. 1,3 kilometroko tartean egingo dituzte obrak, Baias kaletik Bide Zaharren artekoa. Ibaiaren sakonera eta zabalera moldatuko dituzte, funtsean. Lur bolumen handia kenduko dute horretarako, 5.525 kamioietan sartzen denaren baliokidea. Modu horretan, ibaiaren ibilgua handitu eta uholdeen arriskua nabarmen txikituko dute.
“1983ko uholdeen ostean egin ziren moldaketekin, uholde arriskua 100 urteko errepikatze-denborara handitu zen”, azaldu zuen Ander Añibarrok atzo eginiko agerraldian, “obra berri hauekin, errepikatze-denbora hori 500 urtera handituko da”. Beste modu batean esanda: obra horiek eginda milurteko erdi batez desagertuko da 1983koaren tankerako uholde bat egoteko arriskua. “Orain arte, euri asko egin duenean kezkaz begiratu izan diogu ibaiari. Obra honek aukera emango digu begirada hori aldatzeko”, nabarmendu zuen alkateak.
Hirigintza aukerak zabalduz
Atzo egin zuten proiektuaren aurkezpena, Altzarrate zubian. Añibarrorekin batera, beste hiru pertsonek hartu zuten parte agerraldian: Antonio Aiz URAko zuzendariak, Arantxa Tapia sailburuak eta Amaia Barredo Ingurumen Jasangarritasuneko sailburuordeak.
Antzeko gauzak aipatu zituzten guztiek. Besteak beste, nabarmendu zuten proiektua egiteak aukera emango duela Laudioko hirigintzan aldaketa nabarmenak egiteko, orain arte urbanizaezinak ziren zonalde batzuetan etxebizitza edota eraikinak jartzeko aukerak sortuko direlako. Abiatu berri den HAPOaren eztabaidara lotu zuen Añibarrok proiektua, obra honek hainbat aukera zabalduko dituelako, “hurrengo legealdietan garatu beharko direnak”.
Arantza Tapiak, bere aldetik, nabarmendu zuen obrak udalerriko bizitza errazteko balioko duela, eta gaineratu zuen ibaiaren inguru guztietan tokiko espezieak landatuko dituztela, behin lan guztiak amaituta.