Astelehenero bezala, gaur ere dozenaka pentsiodun bildu dira Laudioko Herriko plazan. Baina ez dira ohiko elkarretaratzea egitera mugatu, protesta ekimena ere burutu baitute. Sua eman diete Jose Luis Escrivak (Espainiako Gobernuko Inklusio, Gizarte Segurantza eta Migrazio ministroak) bidalitako gutunei.
Modu horretan, gobernu horren “errespetu eta begirune faltari” erantzun nahi izan diote. Izan ere, euren hitzetan, Espainiako Gobernuak ez du pentsiodunekin hitzartutako konpromiso bat bera ere ez bete, hala nola Lan eta Pentsio Erreformak bertan behera uztea. Gainera, Laudioko pentsiodunen arabera, erreforma horien ondorioetako batzuk larriagotu egin dira azken bi urteetan eginiko aldaketekin. Euren ustez, eginiko moldaketek pentsioak kaltetuko dituzte, “etorkizunekoak batez ere”:
Horregatik, pentsiodunek haserre jaso dute ministroak bidalitako gutuna, “gezurrez eta erdi-egiez beteta” dagoela argudiatuta. Salatu dutenez, gutunean esaten da pentsioak bataz besteko KPIaren arabera igoko direla, orain arte KPI errealaren arabera igoko zirela esan den bitartean. “Ez dugu ahaztu behar, Escriva jaunak aurkakoa esaten digun arren, pentsiodunon erosmen ahalmena %11 jaitsi dela 2011tik hona”.
Gauzak hala, Laudioko pentsiodunek iragarri dute mobilizatzen jarraituko dutela, “pentsio duinak” lortu arte, “bizitza duinak izateko”.