Gaur arratsaldean egin du Laudioko Udal Gobernu taldeak 2029-2023ko legealdiaren balorazioa. Ander Añibarro alkateak legealdi “emankorra” izan dela adierazi du, ezusteko handiek markatu duten arren. “Oso legealdi konplexua izan da, eta COVID-19ak eragindako pandemiaren ia bi urteri, gerra bati eta orain arte inoiz ezagutu ez dugun prezio-igoerari egin behar izan diogu aurre. Hala ere, egoerari egokitzen jakin dugu, eta 2019an gure bizilagunei egindako promesak betetzen jarraitu dugu”, adierazi du.
EAJ eta PSE-EE koalizio-gobernuko kideek azaldu dute 2019an zehaztutako Legegintzaldi Plana %86an bete dutela eta, zenbakiak “gutxi gorabeherakoak” direla aitortu arren, nabarmendu dute gutxienez lan-ildoen %93 abiarazi dituztela eta %73 amaitu dituztela. Ander Larrinaga zinegotziak argitu du helburuen %100 betetzea “utopia” den arren, “betetze-ehuneko handia” dela.
Mugarri nagusi gisa azpimarratu dituzte herrian “blokeatuta” zeuden zenbait “proiektu historiko”, hala nola “Antzokia eraikitzea, Aretako Kultura Etxea lortzea eta birmoldatzen hastea, edo HAPO berrikusten hastea”. Enpleguan “inoizko EEP handiena” egin izana nabarmendu dute, eta tokiko merkataritzari eta ostalaritzari laguntzeko egindako politikak ere aipatu dituzte.
Inbertsioen aldetik, “inoiz Laudion egindako inbertsioen erakarpenik handiena” lortu dutela goraipatu dute, guztira 70 milioi eurotik gora. Hirigintza arloan, auzoak eraldatzeko “inbertsio publikoaren aldeko apustua” egin dutela azpimarratu dute, eta Larrinagak aipatu du auzo guztiak berdin aintzat hartu dituztela.
Kirolean eta aisialdi osasuntsuan, azken urteetan sortutako espazio berriak aipatu dituzte: pumptrack-a, rokodromoa, kiroldegiko gimnasio eta kantxa berriak, Gardeako tenis-pista estalia, etab. Azkenik, kultur arloan, gizarte-politiketan eta herritarren parte hartzean martxan jarritako planak azpimarratu dituzte.
Koalizioan jarraitzeko prest
Loli Muriel PSE-EEko zinegotziak positibotzat jo du koalizio gobernuaren ibilbidea eta azaldu du horrek asko erraztu duela lau urteetako lana. Ander Añibarrok ere egokitzat jo du koalizioaren jarduna eta argitu du gehiengo osoak “lasaitasuna” eman dien arren “adostasunak” bilatzen ahalegindu direla, baita askotan lortu ere, aurrekontuetan, adibidez.
Hurrengo legegintzaldian koalizioan jarraituko duten galdetuta, Murielek eta Añibarrok erantzun dute “zenbakiek ematen badute” hala gustatuko litzaiekeela. “Emaitzek adieraziko dute jendeak zer pentsatzen duen gure kudeaketari buruz”, gaineratu du alkateak.