CD Laudiok jardunaldi goxoa izan du asteburu honetan, San Viator klubaren kontra garaile izan ostean. Denboraldiaren une erabakigarrian daude laudioarrak eta ez zuten kale egin liderraren aurka. Horri esker, San Viatorrek zuen abantaila murriztu da eta CD Laudiok konfiantza hartu du igoera automatikoaren bila joateko.
Ellakurin giro ezin egokiagoa sortu zuten larunbat arratsaldean garaipena eskuratzeko. Hasteko, CD Laudioko jokalariak harrobiko umeekin atera ziren zelaira. Harmailetan ehunka lagun bildu ziren tokiko kluba animatzeko eta futbolariek ez zieten huts egin.
Lehen gola Andoni amurrioarraren ardura izan zen 17. minutuan berdinketa apurtzeko. Gol horrekin bost sartu ditu azken sei norgehiakoetan.
Bigarren gola ospatzeko 59. minutura arte itxaron behar izan zuten Laudiokoek, Unai Fernandezek egin zuen baselina bati esker.
Edonola ere, partida ez zen hor hil, eta San Viatorrek 2-1 jarri zuen markagailuan. Horren ostean, CD Laudiok eutsi zion emaitzari eta puntuak etxean geratu ziren.
Denboraldiaren hurrengo geltokia Gasteizen izango da, Alaves C taldea izango baitute aurrez aurre. Une hauetan, Alaveseko filiala bigarrena da sailkapenean eta CD Laudio saiatuko da bien arteko tartea murrizten.
Orain arte laudioarrek denboraldi historikoa egin dute, eta 2002/2003 denboraldiko marka berdindu dute; 16 partida jarraian galdu gabe. Datu horiekin, 3. mailara igotzeko eskubidea eskuratzea espero dute.