Apirilaren 22an egun osoko jaia egingo du Cosecha del 48 elkarteak. Laudio Institutua hartuko dute horretarako eta taldearen 25. urteurrena ospatuko dute.
Laudioko elkartea bada ere, antolatzaileek azpimarratu dute eskualdeko edonork parte har dezakela ospakizunean, 1948an jaiotakoa bada. "Okondo, Amurrio, Aiara edota Orozkoko jendeari harrera beroa egingo diegu etortzen badira", azaldu du Adolfo Guerrero taldeko kideak.
Hitzordua bitan banatuko dute. Alde batetik, ordainduzkoa den egitaraua eta, bestetik, publiko orori zuzendutakoa. Lehen zatia 12:00etan hasiko da. Juan Carlos Pinedo apaizak meza eskainiko du eta jarraian askaria, poteoa eta bazkaria izango dira.
Musika, magia, karaokea...
Bazkalostean bakarlari baten emanaldia eta Taylor Magoaren ikuskizuna egingo dituzte. 17:00etik aurrera ekimenak irekiak izango dira. Zehazki, Los Modulos taldeak bi kontzertu eskainiko ditu eta bien artean karaokea egongo da.
Adolfo Guerrerok azpimarratu du Los Modulos taldean Pepe Barbeitok jotzen duela, laudioarra eta Los Yumas bandako kide ohia.
48 euro
Egun osoko jaiaz gozatzeko prezioa 48 eurokoa izango da. Edonola ere, Adolfo Guerrerok azaldu du bestelako formulak bilatu daitezkela norbaitek ezin badio gastu horri aurre egin: "Ez dadila inor geratu parte hartu gabe".
Diru sarrera Laboral Kutxako ES35 303500 4523045 11 69796 zenbakiko kontuan egin beharra dago.
Cosecha del 48 taldeak jadanik itxitako Gastronomia Museoan hasi zuen bere ibilbidea, sukaldaritza tailerrak eta dastatzeak antolatzen, baina gero herriko kulturari lotutako norbanakoak omendu ditu.
Azkenik, elkarteak eskertu nahi izan die laguntzaile guztiei egindako ekarpena. "Guk gure kabuz antolatzen dugu dena eta babes hori gabe ezinezkoa litzateke", aipatu du Guerrerok.