Laudion maiatzaren 28ko udal hauteskundeetarako dagoen boto-asmoaren azterketa egin du Gizaker enpresak, EITBrentzat eginiko inkesta handi baten barruan.
Azterketa egiteko, EAEko 18 urtetik gorako 6.649 pertsona galdekatu dituzte telefono bidez otsailaren 27tik martxoaren 17ra bitartean, horietako 400 Laudion. Inkesten %22,7a egin da euskaraz eta gainontzeko guztiak gazteleraz. Gizakerren arabera, Laudioko inkesten kasuan %4,9koa da akats-tartea.
Zinegotzi bat jokoan
Azterketa horren arabera, EAJk irabaziko lituzke maiatzaren 28ko udal hauteskundeak Laudion, botoen %33,2 lortuta. 2019an botoen %36,4 lortu zuen alderdi jeltzaleak. Horregatik, zinegotzi bat galdu ahalko luke aurten.
EH Bilduk, aldiz, igoera izango luke, botoen %27,8 lortuta (2019an %24,9 eskuratu zuen). Modu horretan, zinegotzi bat eskuratzeko aukera izango luke. Gauzak hala, esan daiteke zinegotzi bat egon daitekeela jokoan bi alderdi nagusien artean.
Gainontzeko talde politikoei begira, aldiz, Gizakerrek ez du aparteko aldaketarik aurreikusten: Omniak bere botoen ehunekoa (%18,4) mantenduko luke, 3 zinegotzi bermatuta. PSE-EE, aldiz, %10,5etik %10,1era igaroko litzateke, bi zinegotziko ordezkaritza mantenduta. Gainontzeko botoek (%4,4) ez lukete ordezkaritzarik lortuko udalean.
Kudeaketaren balorazioa
Inkestatuek 5,4eko bataz besteko nota jarri diote Laudioko Udalak azken lau urteetan eginiko kudeaketari. Hau da, %69,8ak aprobatua eman dio kudeaketari. Aipatu beharra dago baztaz besteko hori berdina dela Araban eginiko inkesta guztiak kontuan hartuta (Gasteizen 5,3koa da bataz bestekoa eta Agurainen 5,8koa). EAEko bataz bestekoa, aldiz, 6koa da. Basauriko Udalaren kudeaketa da notarik altuena duena, 6,4ko bataz bestekoarekin.
Lehentasunak
Udal mailan dauden lehentasunen inguruan ere galdetu du Gizakerrek, baina ez du udalerrikako daturik eman (hiriburuetan zoilik plazaratu ditu banakako datuak). Orokorrean hitz eginda, ekonomia eta enplegua da lehenetasuna inkestatuen %36,1arentzat, eta atzetik doaz segurtasun hiritarra (%28,6), udal zerbitzuak (%17,6), kultura eta kirola (%5,6), garraioa (%3,2) eta trafikoa (%1,9).