Batxilergoa eskaintzeari utziko dio Laudioalde Lanbide Heziketa ikastetxeak datorren ikasturtean. Bi kurtso baliatuko ditu horretarako. 2023-2024 ikasturtean 1. maila eskaintzeari utziko dio, baina 2. mailan dauden ikasleek bertan amaitu ahalko dituzte ikasketak. 2024ko irailean, aldiz, ez du hezkuntza ziklo horren maila bat bera ere eskainiko.
Modu horretan, Laudioaldetik 100 metro eskasetara dagoen Laudio BHI Institutua bilakatuko da udalerrian Batxilergoa eskainiko duen zentro publiko bakarra.
Aiaraldea Komunikabideak jakin izan duenez, Institutuko zuzendaritzak duela bi hilabete izan zuen albistearen berri, eta espazioa moldatzeko lanetan ari da, matrikulazioek gora egin dezaketela aurreikusita.
Bi Batxilergo eskaintzen ditu Laudioaldek: Gizarte Zientziena eta Zientzia eta Teknologiarena. Institutuan ere eskaintzen dira bi ikasketa ziklo horiek, baina hirugarren bat ere dago: Arte Batxilergoa.
Horrez gain, aipatzekoa da baita Institutuak Lanbide Heziketako bi ziklo ere eskaintzen dituela Ellakurin dagoen Gregorio Marañon hezkuntza zentroan: Estetikarena eta Ileapainketarena.