140 orriko liburua plazaratu du Cosecha 48 elkarteak bere 25 urteko ibilbidea ospatu eta balorean jartzeko. Gaur eguerdian egin dute argitalpenaren aurkezpena Laudioko Kultur Etxeko Arraño aretoan, eta gela bete egin dute ekitaldira bertaratutako dozenaka lagunek.
1948. urtean jaiotzako laudioarrek osatzen dute Cosecha 48. 1998. Urtean sortu zuten taldea, modu “erabat espontaneoan”, belaunaldi horretako kideek 50 urte bete zituztenean. Gauzak hala, urteurren bikoitza ospatzen ari dira aurten, 75 urte beteko baitituzte aurten elkarteko kideek.
Laudioko “dinamizazio kultural eta sozialean” lan egiten du elkarteak, eta horri erantzuten dio baita gaur aurkeztu duten liburuak. Hainbat artikulu bildu dituzte argitalpenean, baina Jose Luis Navarrok idatzitakoa da mardulena. Ikerlari laudioarrak 1948. urtean Laudio nolakoa zen azaldu du artikulu zabal batean, hainbat artxibategietatik eskuratutako argazkiez lagundurik. Navarrok hartu du hitza aurkezpenean, eta herriko historiaren hainbat pasadizo aletu ditu.
Cosecha 48 elkarteak eginiko jarduerak ere bildu dituzte liburuan. Elkarteak urtero omentzen du laudioar bat, eta omenaldi horietarako pretsatutako testuak gehitu dituzte lanean. Ardo katak, jardunaldi gastronomikoak, Berakatz Zoparen kofradiaren nondik norakoak edota eginiko bidaia kulturalak ere txertatu dituzte. Bukatzeko, elkarteko kideen talde argazkiak sartu dituzte azken orrietan.
Ospakizuna larunbatean
Larunbatean emango diote segida ‘48ko uztako’ kideek ospakizun segidari, egun osoko jaia egingo baitute Laudioko Institutuan.
Hau izango da egitaraua:
12:00 // Meza
12:45 // Piskolabisa
13:30 // Poteak eta abestiak
14:30 // Bazkaria (parte hartzeko beharrekoa izango da 1948. urtean jaiotakoa izatea eta 48 euroko ekarpena egitea Laboral Kutxako ES35 303500 4523045 11 69796 kontuan.
16:30 // Karaokea
17:15 // Magiaren magia Taylor magoarekin
17:40 // Xabi Basterra
18:00 // Modulos e Iberos
19:00 // Oparien zozketa eta margolarien koadroen entrega, abeslari espontaneoek jarraiturik
20:00 // Modulos e Iberos
21:00 // Jaiaren amaiera ofiziala
