Eneko Banderas motor gidariak atzo egin zuen bere taldearen aurkezpena Drumgorri Aretoan, Valentziara joateko bezperan, han lehiatuko baita Espainiako Kopan.
Ekitaldiaren helburua izan zen lortu dituen babesle berriak aitortzea eta horretarako motorra eta ekipamendua (arropa zein kaskoa) egon ziren ikusgai tabernan. "Aurten jende gehiagok babestuko gaitu, Drumgorri Aretoak, besteak beste, eta ikusgarritasuna eman nahi nien", azaldu du Banderasek.
Aurkezpena denboraldia hasi baino egun gutxi lehenago heldu da, aurredenboraldi korapilatsua izan duelako Banderasek: "Bi istripu izan ditut. Horietako batean saihets bat apurtu nuen eta bestean 2. eta 3. graduko erredurak izan ditut besoan".
Maila igotzea, helburuak egokitzea
Iaz XZ Cup irabazi ostean, Banderasek erronka berria jarri dio bere buruari eta Espainiako Kopan parte hartuko du. Hala ere, zintzoa da bere aukerei buruz: "Ezinezkoa izango da irabaztea. Gidari oso onak daude, abiadura oso altuan joaten direnak. Denboraldia lehen hamabost sailkatuen artean amaitzea oso emaitza ona litzateke".
Horrela, laudioarrak argi dauka hurrengo lasterketan sufrituko duela. Printzipioz, lau probek osatuko dute txapelketa. Asteburu honetan Valentzian egongo da eta gero Bartzelona, Albacete eta Nafarroa ere bisitatuko ditu. "Albaceteko zirkuitua obretan dagoenez, ez dute baztertzen beste lasterketaren bat egitea, Jerezen, adibidez", aipatu du gidariak.
Dena ondo joango balitz, eta denboraldia indartsu amaituz gero, Banderasek izena eman nahi du Nafarroan jokatuko den ESBK txapelketan. "Nahiz eta azken bosten artean bukatu dudan, proba horretan Moto GPko kirolari profesional ohiek parte hartzen dute. Denboraldi osoko helburua izango da esperientzia hori bizitzea".