Gaur aurkeztu ditu Tubacexek 2023ko lehen hiruhilabeteko emaitzak. Enpresaren arabera, inoizko hiruhilabeterik onena izan da, Zehazki, salmentetan 232,2 milioi euro lortu ditu Tubacexek 2023ko urtarrilaren 1etik martxoaren 31ra bitartean; %46,9 gehiago iazko tarte berarekin alderatuta. Hori irabazietara eramanda, ordea, hazkundea are handiagoa da: 2022ko lehen hiruhilekoan 3,4 milioi lortu zituen enpresak. Aurten, aldiz, 10 milioi euro (%196,3 gehiago).
Era berean, 1.650 milioi euroko eskaera-zorroa duela adierazi du multinazionalak eta, horri esker, urte oparoa izango duela eta egungo Plan Estrategikoa beteko duela aurreikusten du enpresak. Horren arabera, emaitzak “konpainiaren produktuen mix onari esker” lortu dira, “baita azken urteetan kostuak doitzeko egindako ahaleginei esker ere, oraindik indarrean dagoen inflazio-testuingurua nabarmen konpentsatzea ahalbidetu baitu”. Izan ere, Tubacex taldeko lantegi guztietan lortu dute errentagarritasun positiboa, oharrean azaldu dutenez.
Inbertsioak
Hiruhileko honetan lortutako irabazien zati bat Saudi Arabian eta Norvegian partaidetzak erosteko eta Abu Dhabiko (Arabiar Emirerri Batuak) planta berrian inbertsioak hasteko erabili ditu Tubacexek (guztira, 8,5 milioi euro). Horrela, finantza-zor garbia 2022ko urte amaieraren antzeko maila berean mantenduko du enpresak (0,7 milioi euro beherago, zehazki), eta EBITDAren (irabaziak interes, zerga, balio-galera eta amortizazioen aurretik) gaineko finantza-zor garbiaren ratioa x2,8-ra murriztu du, “konpainiak 2025erako ezarritako helburu estrategikoa betetzea aurreratuz”.