"Lurzoru industrialak berreskuratzea eta aisialdirako eta etxebizitzareko espazio berriak sortzea". Hori izango du helburu, besteak beste, EH Bilduk, gaur goizeko prentsaurrean azaldu dutenez. Ainize Gastaka Laudioko EH Bilduko alkateagaiak eta Eva Lopez de Arroyabe Foru Aldundiko hautagaiak hartu dute hitza Aretan, Lipmesa fabrikaren aurrean. Izan ere, bertan kokatu nahi dute egitasmoaren zati handi bat: "Asmo handiko plana da. Lipmesa enpresaren pabilioi zahar abandonatuetan eta trenbideko pasagunearen zein Altzarrateko zubiaren artean dagoen espazioetan okatuko da".
'TeknoBerri' izena jarri diote proiektuari, eta 4,2 hektareako espazioa bideratu nahi dute horretara. Modu horretan nahi dute industria zoruak berrreskuratzea eta gazteak Aretara eta Laudiora erakartzea, "baita ibai pasealekua berreskuratzea ere, eko-bulebar baten parte bihurtuz".
Ainize Gastakaren hitzetan, proiektu aintzindaria izango litzateke TeknoBerri, "Europako erresilentzia planei begira interes handikoa". Proposamenak 4 maila ditu. Lipmesan 1.700 m2 adimen artifizialari, teknologia berriei eta errobotikari bideratu nahi dizkiote; prestakuntza zentroa jarrita. "Gainera, enpresa hazitegia ere izango du", erantsi du Gastakak. Horrez gain, aisialdirako, kulturarako eta sozializaziorako espazioak sortzea proposatu dute, "proiektu ekonomikoen eta lurraldearen arteko lotura errazteko". Espazioei dagokienean, gune zabalak eta anitzak izatea planteatu du laudioarrak. "Areta parean Nerbioi ibaiaren erribera berreskuratuko du proiektuak, natur espazioak hedatuz eta uholdeen aurrean erantzuna hobetuz. Ekonomia suspertzeko proiektua da, ehunka pertsona bizitzeko modu berri baterantz erakartzeko eta osagai komunitario eta kohesio sozial handiagoarekin lan egiteko aukera ematen duena":
Eva Lopez de Arroyabek, bestalde, Arabako 88 industriagune biziberritzeko planaren beharra mahaigaineratu du: "Lurzoru industrial asko ditugu eta berraktibatu eta berrantolatu egin behar dugu". Horren adibidetzat jo dute Lipmesa bera, eta Aiaraldeko ekonomiaren indarguneak ere izan ditu gogoan: beiragintza, abeltzaintza, tutu industria...
Natxo Urkixo Aiaraldeko Batzar Nagusietarako EH Bilduko zerrendaburuak ere hartu du parte prentsaurrekoan. Ildo beretik, Aiaraldea suspertzeko Eusko Legebiltzarrean sustatutako ponentzian koalizio abertzaleak eginiko lana nabarmendu dute, "26 milioi euroko inbertsioak ekarri baititu Aiaraldera, epe ertainerako plan estrategikoa egiteaz gain".
Guztira, TeknoBerrik, 4,2 hektarea izango ditu bi gune ezberdinetan:
— EH Bildu Araba (@ehbilduaraba) April 27, 2023
Lipmesa enpresaren pabiloi zahar abandonatuak.
Trenbide-pasagunearen eta Altzarrateko zubiaren artean dagoen espazioa. pic.twitter.com/cOtGSIT4gJ