Laudioko EH Bilduk hurrengo legealdirako zenbait proposamen zabaldu ditu sare sozialen bidez eta horietako bi dira Ekobulebarra eta Envases enpresarako kokapen berria aztertzea.
Ugarten dagoen konpainiari dagokionez, koalizioak adierazi du eskualdeko enpresa traktorea dela eta, ondorioz, "industria-eremu zabalago eta hobeto komunikatu batera eramateko aukerak" mahai gainean jarri behar direla. Hori ekonomikoki mesedegarria izan ez ezik, hobetzeko tartea emango lioke Ugarteko auzuneari "eraikin eta lurren zati bat kirol ekipamendurako eta beste erabilera publiko batzuetarako berrerabiliz, eta, Lamuza eta Arrañoko parkeekin lotutako etxebizitza eta aisialdirako gune berriak sortuz".
Ekobulebarraren ideia, ordea, aldaketa klimatikoari aurre egiteko ekimena da, CO2 isurketen hustubidea izan dadin. Areta eta Laudio lotuko luke eremuak eta "etorkizuneko belaunaldiek bizitza duinak eraikitzeko behar duten bizi-espazio berria eskainiko luke: bidegorriak, topaguneak, jolasguneak, hiri eta eskola-baratzeak aire zabaleko kirol-guneak, bainu eta aisialdi-guneak... izango lituzke".
Laudio Antzokia
Horrez gain, EH Bilduk kritikatu du egungo udal gobernu taldeak errealitatetzat jo zuela Laudio Antzokia azaroaren 22an egindako agerraldian eta salatu du azken asteetan obra geldirik dagoela makinen gabeziagatik.