Latiorro ikastetxearen historia biltzen duen argazki erakusketa antolatu dute Laudioko Kultur Etxean. Ikastetxeak asteburu honetan ospatuko du mende erdia, eta ospakizunen barruan kokatu dute egitasmoa.
Bildumak eskolaren historia luzea herrira gerturatzea du helburu. Latiorroko irakasle-ohi talde bat da argazki erakusketaren atzean dagoena. “Zuzendaritza berria da, eta guri proposatu ziguten erronkari heltzea. Guk oso gustura heldu diogu, gainera”, azaldu zuten inaugurazioan.
Erakusketa maiatzaren 22ra arte egongo da ikusgai eta, gero, Latiorroko webgunean eskegiko dituzte argazki guztiak. Halaber, maiatzaren 20an -larunbata- erakusketa ez da ikusgai egongo. Izan ere, egun horretan latiorroko 50. urteurreneko ospakizun handia egingo dute ikastetxean bertan. Egun osoko egitaraua prestatu dute eskolan eta 400 lagun baino gehiago bilduko dituzte herri bazkarian.
Menendez Pidal eta Ortega y Gasset
1973an sortu zen eskola. Garai hartan Laudioko biztanleria izugarri hazi zen, eta ezinbestekoa zen ikastetxe berriak irekitzea. Argazki erakusketarako ikastetxearen eraikuntzako argazkiak lortu dituzte ere.
Hasieran bi zentro zeuden gaur egun Latiorro ikastetxeak hartzen duen orubean: Menendez Pidal eta Ortega y Gasset. Bi ikastetxeek 1995ean egin zuten bat, Latiorro LHI ikastetxeari bide egiteko.
Txani Rodriguez idazleak edota Silvia Manrique hockey jokalariak testuak prestatu dituzte erakusketarako, beste askoren artean
Hamaika ekintza, hamaika irudi
Argazki erakusketa gaika antolatu dute: “Ikastetxean egiten ziren eta, oraindik ere egiten diren, jarduera eta ekintza desberdinak erakutsi nahi izan ditugu”. Gauzak horrela, barnetegiekin, inauteriekin, kirol-ekintzekin… lotutako argazki sortak aurkituko dituzte bertaratzen diren herritarrek. Ingurumen arloarekin lotutako argazki bilduma bat ere osatu dute. Izan ere, Latiorro ikastetxeak lotura estua izan du gaiarekin, eta dozenaka ekintza burutu dituzte bertan ingurumenarekin lotuak.
Oroitzapen bilduma
Argazkiekin batera, ikasle eta irakasle ohien testigantza idatziak ere jaso dituzte erakusketan. Besteak beste, Txani Rodriguez idazle laudioarrak edota Silvia Manrique Hockey jokalari olinpikoak idatzi dute euren eskola-garaiaren inguruan. Liburu zuri bat ere prestatu dute, bisitariek euren iritzi eta oroitzapenak bildu ditzaten.
