Historikoki, EAJ eta Ezker Abertzalea txandakatu dira Laudioko Udaleko gobernuan. 2011n eta 2015ean EH Bilduk lortu zuen alkatetza, Natxo Urkixo buru. 2019an, aldiz, Ander Añibarrok hartu zuen aginte makila. EAJk 3.581 boto jaso zituen (%36,15), EH Bilduk 2.448 (%24,71), Omniak 1.807 (%18,24) eta PSE-EEk 1.035 (%10,45).
Jeltzaleek eta sozialistek akordioa erdietsi zuten udal gobernua osatzeko eta, ondorioz, gehiengoarekin gobernatu dute azken lau urteetan, udalbatzako 17 zinegotzietako bederatzirekin.
Gehiengoen osaketa
Gauzak hala, maiatzaren 28ko hauteskundeak korapilatsuak izango direla aurreikusi daiteke. Zerrenda bozkatuena zein den garrantzitsua izango da; baina, agian ez erabakiorra. EITB Focusek martxoan argitaratutako inkestaren arabera, zinegotzi bat egon daiteke jokoan EAJ eta EH Bilduren artean, baina Omnia eta PSE-EEren emaitzak ere hartu beharko dira kontuan, funtsezkoak bilakatu daitezkeelako balizko aliantzak edo gehiengo absolutuak osatzerako orduan.
Gauzak hala, baliteke maiatzaren 28ko hauteskundeak igarota apur bat itxaron behar izatea Laudioko alkate berria zein izango den jakiteko, hurrengo egunetako negoziazioek garrantzi berezia izan dezaketelako, emaitzen arabera.