Hauteskunde kanpainako ekitaldi nagusia egin zuen PSE-EEk Laudioko Aldai Plazan larunbatean. Eneko Andueza euskal sozialisten idazkari nagusia, Cristina Gonzalez ahaldungaia eta Idoia Mendia izan ziren bertan, Loli Murieli babesa adierazteko.
Alkategai sozialistak balioan jarri zuen azken lau urteetan udal gobernuko kide bezala egindako lana. Besteak beste, Lamuza parkearen erreforma integralerako, antzokiaren eraikuntzarako edota Abasto plazaren proiekturako lortutako inbertsioak jarri zituen horren adibidetzat. "Erakundeen arteko lankidetzaren emaitza da hori, eta Aldundian, Eusko Jaurlaritzan eta gobernu zentralean presentzia izateak asko laguntzen du. Sozialistok ekintzekin erakusten dugu jendearen kezkei erantzuten diegula", adierazi zuen Murielek.
"Euskal eskuinagatik eta ezker abertzaleagatik engainatuak ez izatea" eskatu zien Murielek hautesleei. EAJren inguruan esan zuen "ez duela ezer egiten, eta dominak janzteaz kezkatzen dela soilik". Ezker Abertzalea, aldiz, "euskal nortasunaren aldeko borroka hutsalean galduta" kokatu zuen alkategaiak.
Cristina Gonzalez ahaldungaiak, bere aldetik, Lamuza parkea berritzeko obrak behin betiko gauzatzeko konpromisoa hartu zuen, baita Kexaako monumentu multzoa Aiaraldeko "kulturaren motore" bilakatzeko ere.