Bilbon bizi den mallorcarra da Maria Francisca Mas Riera, eta beste lagun batzuekin batera Gehiago Edicions zigilua sortu du. 2021eko urte amaieran eskalada prisma feministatik jorratzen duen Escalantes izeneko testigantza-liburua argitaratu zuen, eta orain gutxi Ingrávidas kaleratu du, egile anitzeko lana. Zigilua “kirolaz, eskaladaz eta transfeminismoaz hitz egiteko” tresna dela azaldu dio Aiaraldea Komunikabideari Masek.
Hala, Deporte desde los márgenes (kirola bazterretatik) izeneko jardunaldiak antolatzeko aitzakia ere bihurtu da Gehiago Edicions. Sustatzaileak azaldu duenaren arabera, Escalantes aurkezteko biran jende asko ezagutu zuen, eta “gauzak antolatzeko grina duten pertsonen sare bat” osatu du. Martxoaren 25ean Bilboko Karmelan egin zuten kirola eta “bazterrak” ardatz zituen lehen jardunaldia. Egun horretako egitarauak eta larunbatean Orbekon egingo dutenak antzeko egitura izango dute, edukiak aldatuta: goizean emakume eta sexu-disidentzientzako espazio ez-mistoa, ikus-entzunezko baten proiekzioa, bazkaria, eta hitzaldia edo aurkezpena.
Larunbatean Orbeko Etxean
Azaldu bezala, emakumeentzako eta sexu-disidenteentzako espazioarekin emango diote hasiera maiatzaren 27ko jardunaldiari. 12:00etatik 13:00etara Ainhoa Garciak dinamizatuko du espazioa, gorputzean eta, batez ere, lodifobian fokua jarrita. Ostean, Light dokumentala jarriko dute, eskalada eta elikadura nahasmenduak jorratzen dituen lana.
Bazkaria egingo dute ondoren, beganoa eta glutenik gabekoa, ohi gisara. Antolatzaileek eskatu dute ostegunerako 639.477.268 zenbakian izena-emateko, otordua prestatu ahal izateko. Bazkalostean Itxi Guerrak kirolaren eta desgaitasunaren inguruko hitzaldia emango du. Lucha contra el capacitismo. Anarquía & Capacitismo liburuaren idazlea da Guerra eta “kirola ikuspuntu antikapazitista batetik” jorratuko du Orbeko Etxean.
Maria Francisca Masek azaldu du horrelako jardunaldiekin, ondo dinamizatuz gero, “oso espazio politak” sortzen direla. “Konfiantza eta segurtasun espazioak sortzen dira eta, nahiz eta momentuan pertsona batzuk aktiboago edo isilago parte hartu, ondoren, momentu lasaiagoetan, sarea sortzen da”. Hori da, batez ere, bere helburua: sarea sortzea, jendeak elkar ezagutzea eta “kirolari buruz beste perspektiba batetik hitz egitea”.
Ingrávidas
Esan bezala, Gehiago Edicions-en bigarren argitalpena da Ingrávidas. Escalantes-en “ondorio” bat dela azaldu koordinatzaile lanak egin dituen Maria Francisca Masek. Izan ere, lan horri esker ezagutu dituen pertsonek egindako lanekin osatu du bigarren hau. “Escalantes-ek emakumeei buruz baino ez du hitz egiten, beren esperientziei buruz, zelan bizi duten eskalada eta zer den eurentzat. [...] Ingrávidas-en emakume kategoriatik eta normatibotasunetik harago joan gara: emakume lodiek hartu dute parte, trans pertsonek...”, azaldu du. Aitortu du oraindik ere “arrakalak” dituela lanak, pertsona arrazializatuena kasu, baina argitu du ez dutela dena une oro lantzeko asmorik, eta etorri ahala joango direla ertz desberdinei heltzen.
Hainbat pertsonaren lan anitzez osatuta dago Ingrávidas: narrazioak, olerkiak, marrazkiak, argazkiak... Lanak harilkatzen dituen gaia gorputza da, hau ere hainbat ertzetatik landua: eskalatzeko makina den gorputza, gorputz eria, gorputz gaixoa... Abortua, lodifobia eta trantsizio prozesuak bezalako gaiak ere jorratzen ditu Ingrávidas-ek.
Lan trinkoa eta mamitsua dela aurreratu du koordinatzaileak, irakurri eta hausnartzekoa eta, akaso, ez kolpe bakarrean irakurtzekoa. Izan ere, “nahiko fanzineroa” dela azaldu du eta, hain zuzen horrexegatik, atalez atal irakurtzeko aukera ematen duela.
Orbeko Etxeko jardunaldietan aipatutako hiru liburuak eskuratzeko aukera egongo da (Escalantes, Ingrávidas eta Lucha contra el capacitismo. Anarquía & Capacitismo), beste hainbat fanzinez eta liburuxkaz gain. Gainera, Escalantes Instagram kontuan eta Bilboko DDTn eskuratu daitezke aipatutakoak eta Ingrávidas maiatzaren 31n aurkeztuko dute Bilboko Malatesta tabernan (Goienkale 10), arratsaldeko 19:00etan.
