Laudioko EH Bilduk hiru proposamen zabaldu ditu hauteskunde kanpainako azken egunetan; lehen sektoreari, gazteei eta udal kudeaketari dagokienez.
Abeltzaintzaren esparruan, koalizioak honako konpromisoa hartu du: "Alkatetzan egon bezain pronto Bedarbide elkartearekin hitzarmen bat sinatuko dugu Laudioko baserritarrek hara beraien ganadua eraman ahal izateko. Bertan animalia anitzak trasformatu ahalko dira".
Gazteei dagokienez, taldeak adierazi du gazteen ekarpena beharrezkoa dela parte hartze prozesuetan: "EH Bildu izango delako gazteoi instituzioetan ahotsa emango diguna, gure problematikei entzungor egin beharrean errotik heltzen diena eta konponbideak mahai gainean jartzen dituena; finean, gure etorkizunaren inguruan erabakitzeko aukerak eskaintzen digun aukera bakarra".
Azkenik, udal kudeaketan burokraziaren kontrako bulegoa ezarri nahi dute: "Helburua izapide eta prozedura ahalik eta gehien sinplifikatzea eta errazte eta eskuragarriean eskuratu ahal izan dezaten. Horrela, administrazioaren eta bizilagunen arteko harreman arina zailtzen duen arrakala burokratikoa ezabatuko da".
Horrez gain, koalizioak udalerriko argazkia oparitu zuen atzo ekitaldi nagusian: "100 x 63cm-ko Laudio bat, txorien begietatik ikusita balitz bezala, gure giza komunitatea nola eratu den eta hemendik aurrera nola garatu daiteken hausnartzeko aukera ematen diguna".