Lehia estua izan da azken unera arte, baina azken momentuan EH Bildu eta EAJren arteko 29 botoko aldeak azken zinegotzia eman dio Ainize Gastaka buru duen hautagaitzari, duela lau urte baino bi ordezkari gehiago. Horrenbestez, EH Bilduk lortu du ordezkaritzarik zabalena Laudioko Udalean, zazpi zinegotzirekin. Koalizio abertzalearen zerrendak 3.087 boto lortu ditu, 2019an baino 639 boto gehiago, %24ko igoera.
Bestalde, EAJk 523 boto galdu ditu, 2019ko Udal Hauteskundeekin alderatuta eta, aurretiaz aipatu bezala, zerrenda bozkatuenetik 29 botora geratu da. Ordezkari kopuruan ere eragina izan dute emaitza negatiboek; jeltzaleek zinegotzi bat galdu dute eta sei izango dituzte aurrerantzean.
Omniak ere behera egin du boto kopuruan. Guztira, 1.365 boto lortu ditu eta 442 hautesle galdu ditu 2019ko emaitzekin alderatuta. Ordezkari kopuruan, ordea, ez du aldaketarik izango talde independenteak. Azken legealdian bezala hiru zinegotzi izango ditu, sortuko den udalbatza berrian ere.
Ordezkari publiko bat galdu duena PSE-EE izan da. Talde sozialistak, EAJk eta Omniak bezala, beherakada izan du boto kopuruan. Botoen %9,64 lortuta Loli Muriel izango da PSE-EEren zinegotzi bakarra Laudiko Udalean datozen lau urtetarako.
Gehiengo berrien esperoan
Emaitzek aldatu egin dute Laudioko Udaleko mapa politikoa, eta koalizio berriak sortu beharko dira udal gobernuak eskuratzeko. PSE-EEren beherakadaren ondorioz, Omnia talde independenteak izango du gehiengo posibleak osagarritzeko giltza; baina, kapitulo hori ekainean ebatziko da.