Laudioko merkataritza eta ostalaritza elkarteak herriko hamahirugarren pintxo lehiaketa antolatu du maiatzean. Dastatu Laudio lelopean, 17 establezimenduk hartu dute parte pintxo barrarik onenaren eta pintxo libre onenaren kategorietan.
Oro har, APILLek “pintxoen maila handia” eta lehiaketak “herritarren eta bisitarien artean izan duen harrera bikaina” azpimarratu ditu.
Epaimahai teknikoa “sukaldari ospetsuek” osatu dute eta herritarrek ere bozka emateko aukera izan dute. Horien artean, gainera, zenbait opari txartel banatu zituen APILLek, 250 euroko bat, 100 euroko bat eta 25 euroko hamar.
Atzo, maiatzaren 31n, egin zuen APILLek sari banaketa Laudioko Lamuza parkeko Kasinoan. Bertan banatu zituen aurrez aipatutako sariak herritarren artean eta balorazio teknikoaren zein herri-balorazioaren sariak bi kategorietan, hau da, pintxo barrarik onenaren eta pintxo librerik onenaren sailetan.
Epaimahai teknikoak Lauri Barria saritu zuen bi kategorietan eta herritarrek, aldiz, Kafe Iluntze jo zuten bi sail horietako irabazle. Lauri Barria, gainera, pintxo librerik onenaren herri-balorazioan hirugarren sailkatu zen, epaimahai teknikoaren baloraziorik onena jasotzeaz gain.
Honakoak izan ziren emaitzak:
Pintxo barrarik onenaren balorazio teknikoa: Lauri Barria
Pintxo librerik onenaren balorazio teknikoa:
1- Lauri Barria
2- Haitzulo Barri
3- Azoka Cocktail Bar
Pintxo barrarik onenaren herri-balorazioa: Kafe Iluntze
Pintxo librerik onenaren herri-balorazioa:
1- Kafe Iluntze
2- Laudioko Batzokia
3- Lauri Barria