Laudioko ordezkari politikoekin batzartu dira gaur Lamuza, La Milagrosa, Fabian Legorburu, Latiorro, Laudio Ikastola eta Laudio BHI ikastetxeetako ikasleak, udalbatza aretoan.
Agenda 2030 proiektuaren barruan egindako lana aurkeztu eta bertan hartutako konpromisoak eta proposamenak azaldu dizkiete gazteek udal-talde politikoei.
Honako hauek dira luzatutako proposamenak arloz arlo:
- Argiteria: Argiteria publikoa LED motakoa izatea, argiteria publikoan energia berriztagarrien erabilera bultzatzea; soilik beharrezkoak diren farolak piztuta izatea; herriko establezimendu eta saltokietako erakusleihoetako argiak itzaltzea; Gabonetan LED argiak erabiltzea eta haien kopurua murriztea; eta argi-kutsadurarik ez dagoen begiratoki bat prestatzea izarrak ikusi ahal izateko.
- Mugikortasuna: Udalerrian bizikleta eta patinete elektrikoen alokairua sustatzea eta garraio publikoa bultzatzea.
- Energia berriztagarriak: Udalak eguzki-panelak instalatzea.
- Energia-pobrezia eta -eraginkortasuna, eta klima-babeslekuak: Herriko gazteentzat negurako gune bat prestatzea, egoera zaurgarrian daudenei laguntzak ematea eta berdegune gehiago egokitzea, parkeak, besteak beste.
- Energiaren erabilera arduratsua: Udal-eraikinetan tenperatura egokia kontserbatzea eta mantentzea, eta herriko kaleetan zehar entxufeak instalatzea.