Gaur eguerdian prentsaurrekoa deitu dute Tubacexeko auziperatuek, senideek eta lagunek, Tubacex enpresako langile batzordearen eta Erresistentzia Kutxaren babesarekin. Agerraldiaren xedea izan da jakinaraztea ostegunean, ekainaren 15ean, langile bat epaituko dutela 2021eko greban gertatutako istiluen harira.
Beharginak 21 hilabeteko espetxe zigorrari egingo dio aurre Gasteizko epaitegian, agintaritzaren kontrako atentatua eta desobedientzia leporatuta. 9:30ean elkarretaratzea egingo dute epaitegiaren aurrean, elkartasuna adierazteko.
Prentsaurrekoaren deitzaileek gogoratu dute Ertzaintzak betirako lesioa eragin ziola langileari atxiloketan eta nabarmendu dute poliziek bereziki bortitz jokatu zutela berarekin.
Beste epaiketa bat irailean
Aste honetan egongo den epaiketaz gain, gaurko agerraldian azaldu dute beste bat egongo dela irailean. Eskualdeko beste enpresetako hiru langile eseriko dira akusatuen aulkian, 4 urte eta 7 hilabeteko espetxe zigor eskaerekin.
Prentsaurrekoaren antolatzaileen iritziz, enpresako langileak ez direnen kontra "gehiegizko zigorrak" eskatzeak bi helburu ditu. Alde batetik, "saltzea protestetan gertatutako istiluak grebarekin zerikusirik ez zuten herritarrek sortu zituztela". Bestetik, borroka kriminalizatzea eta ekiditea herritarren eta gizartearen artean babesa jasotzea.
Guztira, 20 urteko espetxe zigor eskaerak
Eskaera fiskal guztiak aintzat hartuta, grebalariek 20 urte baino gehiagoko kartzela zigorrak metatu dituzte. Aipatutakoez gain, beste bi langile daude epaiketaren zain.
Lehenengo epaitua, absolbitua
Tubacexeko grebari lotutako lehen epaituak hartu du hitza agerraldian, besteak beste, eta berak gogoratu du absolbitua izateaz gain, "epaileak argi eta garbi utzi zituela ertzainen gezurrak".
Horregatik guztiagatik, akusatu guztien absoluzioa aldarrikatu dute, babesa eta elkartasuna adierazteko deia zabaltzearekin batera.