Una quimera de vida liburua argitaratu berri du Iñigo Martinez laudioarrak. Eleberriak egilearen bizipenetan dauka oinarria eta Brunoren istorioa kontatzen du. Gazte horri osteogenesis inperfektua diagnostikatzen diote -kristalezko hezurren gaixotasuna- eta, ondorioz, bere existentzia guztiz aldatuko da.
"Brunok gorputz berezia du eta horrek baldintzatzen ditu bere harremanak eskolarekin, amarekin, arrebarekin, lagunekin... Patologia horrekin bizi den pertsona baten errealitatea ikusgai egin nahi izan dut", azaldu dio Aiaraldea Komunikabideari.
Aniztasun funtzionala duen pertsona baten bizipenak islatzeko baaliatu du Iñigo Martinezek 'Una quimera de vida' eleberria
Hori irudikatzeko, Iñigo Martinezek bere bizitzan izandako esperientzia erabakigarriak azaleratu ditu, flashback moduan.
Itxialdian idatzita
Laudioarrak aitortu du ez duela bere burua idazletzat jotzen eta liburua ez dela aldez aurretik pentsatutako proiektu baten emaitza. "Itxialdiaren ondorioa izan zen. Ezin nuen ezer egin eta ekin nion arratsaldeak hartzeari eta idazteari. Egia da aurretik poemak edo testuak idatzi ditudala sare sozialetan, baina liburu bat idazteko hitzak topatu behar izan nituen. Bizipen-testua da, nahiz eta autobiografiatik ihes egin dudan. Hau da, fikzioa da, baina aldi berean nire bizitzaren lekukotza".
Eleberriari berari dagokionez, Iñigok aipatu du pozik dagoela egindakoarekin.
Aurkezpenak
Una quimera de vida autoekoizpena da. "Nire osasun egoeragatik nahiago nuen argitaratzeko prozesua gehiegi ez luzatzea, eta aukera eta bitartekoak izan ditudanez nire kabuz dena egiteko, aurrera egin dut. Oztopo handiena da banaketa. Nik egin beharko dut eta horretarako ahalik eta aurkezpen gehien egingo dut urte bukaerara arte, zuzenean nik saltzeko".
Asteburuan bi lekutan aurkeztuko du liburua egileak Laudion bertan
Interesdunek asteburu honetan bi aukera izango dituzte Iñigo Martinez entzuteko. Alde batetik, ostiralean Kulturlabeko egoitzan egongo da 19:30ean. Bestetik, Orbeko Etxean larunbateko 12:30ean ere mintzatuko da testuari buruz.
Batean edo bestean parte hartzeko aukera ez dutenek, Zuhaitza liburudendan topatu ahalko dute eleberria salgai larunbatetik aurrera.