Ariadna Martinez sopranoak urtarrilean jakin zuen 2023/2024 denboraldian Espainiako Orkestra eta Abesbatza Nazionalean arituko zela; baina, berriki denboraldiaren aurkezpena egin arte isilpean gorde behar izan du informazioa. Hala adierazi du Radio Llodiori eginiko elkarrizketa batean.
Castinga gainditu eta gero, Faureren Requiema interpretatzeko hautatu dute, Enrique Sanchez baritonoarekin batera. Biak elkarrekin arituko dira Juan Carlos Matamoros eta Jordi Navarro tronboi-jotzaileekin, Jose Francisco Martinez tuba-jotzailearekin eta Sofia Martinez narratzailearekin, Edmundo Vidal zuzendariaren agindupean.
Estreinaldia 2024ko urtarrilaren 28an izango da, 12:00etan Auditorio Nazionaleko areto sinfonikoan. Nolanahi ere, zuzenean entzuteko aukerarik ez dutenek RTVE Espainiako irrati-telebistaren Radio Clásica saioan izango dute emanaldiaz gozatzeko aukera.
Martinezek Radio Llodiori adierazi dio urduri bezain pozik dagoela, baina gogor lan egingo duela onena emateko bere ibilbide profesionalean mugarria izango den egunean.