Oporretan ere, dagoen tokitik gertuko lasterketetan parte hartzea gustatzen zaio Josu Apraiz korrikalari laudioarrari. Aurten Villajoyosa hondartzako (Valentzia) krosean eman du izena, oporrak igarotzen ari den tokitik hurbil baitago.
Atzo bertan -uztailak 16- izan zen norgehiagoka, igandean. 08:00etan abiatu ziren korrikalariak ia bederatzi kilometroko ibilbidea osatzeko. “Eta eskerrak”, aitortu du Apraizek; izan ere, bere korrikalari ibilbide luzean inoiz sufritu duen hezetasun handiena zegoen.
Korrikalariak berak Aiaraldea Komunikabideari azaldutakoaren arabera, hasiera-hasieran jarri zen lasterketa buru, atzean lau korrikalariko taldetxoa zuela, baina tarte batera. Zirkuituak bi bira zituen hondartza-ertzean, eta lehen itzulia amaitzear zeudela, korrikalarietako batek laudioarra harrapatu zuen. “Berari egozten diot meritua, ni erritmo berean mantendu nintzelako, baina bera apurka erritmoa azkartzen joan zen”, argitu du. Hala, ibilbidea osatzeko bi kilometroren faltan, beste korrikalariak are gehiago azkartu zuen pausoa eta Apraizek aitortu du ezin izan ziola jarraitu.
Hala ere, “oso-oso pozik” agertu da emaitzarekin eta postuarekin: lehena sailkatu zen bere kategorian eta bigarrena sailkapen orokorrean.
Orain, 10-12 eguneko erabateko atsedena hartuko du eta ostean pixkanaka hasiko da erritmoa berreskuratzen, baina presarik gabe. Izan ere, Laudio Atletismo Taldeko korrikalariak aurreratu du datorren denboraldian ere Donostiako maratoia izango duela helburu nagusi gisa seguruenik, azaroaren 26an izango dena.