Josu Ortiz Delgadok 2017an konposatu zuen berriki Global Music Awards-etan saritua izan den pieza. Bilboko Juan Crisostomo de Arriaga kontserbatorioan gradu profesionaleko bosgarren mailan zegoen, eta orkestra sinfonikorako eta korurako idatzi zuen The Himalayas Suites. Urte horretako maiatzean estreinatu zuen obra kontserbatorioan bertan.
Gerora, pieza bera bandarekin interpretatzeko aukera luzatu zioten eta orduan egokitu zuen banda sinfonikorako eta korurako. Laudioko Udal Bandarekin estreinatu zuen, 2018ko Gabonetako kontzertuan.
Horren ostean, pieza bera Bilboko Udal Musika Bandak interpretatzea proposatu zioten, eta ezin izan zuen ezetz esan. “Ezin nion uko egin, inoiz nire obraren bat interpretatu duen talderik profesionalena baita”, azaldu dio musikagileak Aiaraldeari. Jose Rafael Pascual Vilaplanak zuendu zuen pieza. “Ospe handiko nazioarteko zuzendaria da, zuzendari izateaz gain, banda munduan konpositorea ere bada”.
Estreinaldia bideoz grabatu zuten -behean ikusgarri dagoena- eta, horren ostean otu zitzaion laudioarrari Music Global Awards sarietara aurkeztea. Azaldu duenaren arabera, ez dute dute sari ekonomikorik banatzen, “soilik errekonozimendua, zure musikari-balioa aitortzen dute”. Mundu osoko eta mota guztietako musikariak aurkezten dira urtero antolatzen den sariketara.
Hiru sari maila daude: urrezko aipamena, zilarrezkoa eta brontzezkoa. Musikariek edozein musika estiloko piezak aurkez ditzakete: popa, reggaetona, performancea... Ortizek konposizio klasikoko kategorian aurkeztu zuen bere lana eta zilarrezko aipamena eskuratu du.