EH Bilduk, EAJk, Omniak eta PSE-EEk osatzen duten Laudioko Udaleko Bozeramaileen Batzordeak gaur goizean egin du Autoglas-Glavistako langileei babesa adierazteko ekitaldia. Adierazpen instituzionalean Guardian jo dute “muturreko egoera larri honen zuzeneko arduradun”, ez delako konponbiderik errazten ari.
Izan ere, 240 langile dituen Autoglas-Glavista erosteko interesa duen inbertsore bat dagoen arren, Guardianek uko egin dio enpresaren bideragarritasunerako beharrezkoak diren lursailak saltzeari. Laudioko Udalak salatu du Guardianek Parter Capital putre-funtsari enpresaren ekoizpen-lerro bat zen Autoglas-Glavista saldu zionetik “desinbertsioak eta ABEEEak gertatu direla, eta orain itxiera mehatxua egin dutela, bestelako irtenbiderik badagoen arren”.
Zabaldutako adierazpenean azaldu dute Udalak berretsi egiten duela “enpleguarekin eta industria-jarduerarekin duen konpromisoa” eta dei egin diete gai horretan eskumena duten erakundeei egoerari konponbidea bilatzeko lanean jarraitzera. Era berean, langileei eta haien familiei elkartasuna adierazi diete eta azaldu dute “bizi duten egoera latzean laguntzeko prest” daudela.