San Roke jaien testuinguruan eta hauen programazioaren barruan, lehen kart lasterketa iritsiko da Laudiora. Zehazki, abuztuaren 19an izango da, Latiorro auzoan, eta goi mailako 20 pilotu bertaratuko dira. Tartean dira Albert Costa, Jaime Alguersuari, Dani Clos, Aleix Alcaraz, Nil Montserrat eta Jon Lainz laudioarra, besteak beste.
Laudioko San Roke Open Saria deitu diote kirol ekitaldiari eta Agustin Arbex antolatzaileak azaldu du espero dutela datozen urteetan jarduera udalerrian finkatzea. Izan ere, goi mailako pilotuen lasterketaz gain, herritarrek Club Porscheren auto erakustaldiaz gozatzeko aukera izango dute.
Kart lasterketa Goikogane, San Martin eta Aspaltza kaleetan zehar egingo da, abuztuaren 19ko 16:00etatik aurrera. Arbexek azaldutakoaren arabera, ibilbidean ez dute apenas moldaketarik egin behar izan, oro har “primeran betetzen dituelako pilotu profesionalen eskakizunak”.
Nerea Gonzalez kirol zinegotziak ere espero du probak “harrera ona izatea” eta “bizilagunek lasterketaz gozatzea”. Lasterketa-autoak maite dituztenek, beraz, badute hitzordu garrantzitsua Laudioko jaietan.