Laudioko Udalak oharra kaleratu du datozen hilabeteetan “udalerri barruko mugikortasunari heltzeko eta herria zeharkatzen duen bidegorria berrantolatzeko” partaidetza-prozesu bat abian jarriko duela iragartzeko.
Izan ere, iazko urrian egin zituen enpresa esleipendunak trafikoarekin partekatutako bidegorri sarearen margotze-lanak; baina, “neguko denboraldiko klimatologiaren ondorioz”, zoladura gaineko lerroak ezabatu ziren. Udalak azaldu duenaren arabera, hezetasunak eta hotzak pintura behar bezala ez itsastea eragin zuten.
Hala, Nerea Gonzalez kirol zinegotziak azaldu du bere garaian enpresari egindako lana erreklamatu zitzaiola, “lineak zorutik ezabatu zirelako”, eta orain enpresak marrak berriz margotzeari ekin diola, “bere kabuz” eta “Udalarekin harremanetan jarri gabe”.
Horren aurrean, Udal Gobernu Taldeak adierazi du bidegorriak berrantolatzeko proiektu bat abian jartzeko konpromisoa hartu duela, “herritarren parte-hartzean oinarrituta”. “Gure herritarren eskutik bultzatuko dugun beste prozesu bat baino ez da hau; haiek erabaki behar dute etorkizuneko Laudio nolakoa izango den”, azpimarratu du zinegotziak.