APILLek Ongi etorri udazkena kanpaina abiatuko du Laudio Berrikusi aplikazioaren erabilera sustatzeko eta erabiltzaile berriak eskuratzeko. Irailaren 4an, astelehenean, abiatuko da egitasmoa. Horren barruan, urriaren 16ra bitartean, Laudioko saltokietan gutxienez 10 euroko erosketaren bat egiten dutenek 1.000 euroko erosketa-txartel baten zozketan parte hartu ahalko dute.
Parte hartzeko erosketa tiketa igo behar da Laudio Berrikusi aplikazioara, ‘Club LB’ atalean ‘Zozketak’ botoia sakatu eta bertako jarraibideei jarraituz. Gastatutako 10 euro bakoitzeko partaidetza-txartel bat eskuratuko dute Laudio Berrikusi aplikazioa erabiltzen dutenek. Erosketak irailaren 4tik urriaren 16ra egin ahalko dira eta zozketa urriaren 18an egingo du APILLek. Sari banaketa urriaren 20an, ostiralean, egitea espero du Laudioko merkatari eta ostalarien elkarteak.
Laudio Berrikusi
Duela urtebete baino gehiago jarri zuen APILLek Laudio Berrikusi ekimena martxan. Mugikorretan deskargatzen den aplikazio horren helburua da “tokiko enpresak bizilagunekin eta bezeroekin konektatzea”. Dagoeneko 3.000 erabiltzaile ditu tresnak. Horregatik, oraingo kanpainaren helburua hauen artean aplikazioaren erabilera dinamizatzea eta deskarga berriak lortzea da, publiko gaztearen artean batez ere.
Urte amaiera bitartean hainbat ekintza egingo ditu APILLek eta Ongi etorri udazkena izango da horien artean lehena. Kanpainak badu bigarren helburu bat, tokiko saltokiak aktibatzea, hain zuzen. Hauek proposamen gehiago bidaltzea nahi du elkarteak, eta aplikazioa bezeroekin komunikatzeko tresna gisa erabiltzea.