Emakume bat atxilotu zuen atzo Ertzaintzak Laudioko Ugarte auzoan, gizon bati labanaz erasotzea leporatuta. Ertzaintzak jakinarazi duenez, erasotzaileak “harreman sentimental bat” zuen erasotuarekin, eta etxeko indarkeria kasu moduan ikertzen ari dira.
Ostegunetik ostiralera bitarteko gauean jazo zen gertaera. Bizilagunek ohartarazi zuten polizia. Hala kontatu du Ertzaintza prentsa oharrean: “Bertaratu zirenean, polizia-patruilak gizon bat aurkitu zuen eraikineko eskaileran, sabelaldean odola zeriola. Handik gutxira, emakume bat ikusi zuten, eskuan arma zuri bat zuela eta eskuetan odola zuela”.
Larrialdi zerbitzuak deitu zituzten orduan, gizona artatzeko. Hauek anbulantziaz eraman zuten zauritua Galdakaoko ospitalera. Bien bitartean, poliziek gertatutakoa ikertzeari ekin zioten, eta emakumea atxilotu zuten, etxeko indarkeriaren barruko lesio delitu bat egotzita.
Gaur jarri dute atxilotua Amurrioko Epaitegiaren esku, eta eguerdian utzi dute baldintzapean aske, karguekin eta prebentziozko neurriekin, epailearen aurretik pasa ostean.
Oihartzun handia
Albistea atzo zabaldu zen herrian, ahoz aho zein sare sozialen bidez, baina orain arte ez da informazio ofizialik egon. Ertzaintzak arratsaldeko lehen orduan zabaldu du gaiari buruzko prentsa oharra.