Euskal Herrian irrintzia, aturuxo Galizian, Ekialde Ertainean zaghareet edo zagharit, Marokon barwalá eta youyou... Munduan zehar askotarikoak dira ahots-tradizioari lotutako soinu zorrotz, luze eta modulatuak. Batez ere Afrikako eta Ekialde Hurbileko hainbat ahots-teknikatan oinarrituta, praktika artistikoa garatu du Bruselan egoitza duen YouYou Group taldeak. Hainbat adin eta jatorriko 30 emakumek osatzen dute taldea eta lankidetza proiektu bat garatu dute Kultur Faktoriarekin. Biek ahozko ondarea berpiztu nahi dute, "baina testuinguru berri batera aldatuta".
Ahozko ondarea berpiztu nahi du YouYou-Irrintzi ekimenak, testuinguru berri batera ekarrita
Hori horrela, besteak beste, irrintzi sormen laborategiak, Irrintzien Azpitik emanaldi berezia eta mahai-ingurua, komunitatearekin topaketak… antolatuko dituzte elkarrekin. “Begirada garaikide batetik, praktika tradizional folkloriko hauei esanahi berriak bilatuko dizkiete”, Kultur Faktoriaren esanetan.
Irailaren 18an aurkezpena
Elkarlanaren lehen emaitza datorren astean aurkeztuko dute Aiaraldeko Ekintzen Faktorian (Errotari kalea 4 – 8. pabilioia, Laudio, Araba). Astelehenean aurkezpen irekia egingo dute 19:00etan Bruselatik etorritako kideekin batera. YouYou-Irrintzi, ahots praktika tradizionalaren begirada berri bat proiektuaren nondik norakoak azalduko dituzte bertan eta YouYou Groupek ekotzitako film labur dokumentala proiektatuko dute.
Asteartean eta asteazkenean izango dira irrintzilariei zuzendutako sormen laborategien lehen lan saioak, 17:00etatik 20:00etara. Eskualdeko herri gehienetako irrintzilariek hartuko dute parte eta nazioarteko kideekin beren ahots praktikak elkarbanatuko dituzte eta ahots teknikarekin zein irrintziarekin lotutako bizipenetan sakonduko dute.
Bigarren eta hirugarren txanpa
Urrian bigarren laborategi saio bat egingo dute, 11tik 15era, eta bertan ere Bruselatik etorritako kideekin partekatzeko abagunea izango dute eskualdeko irrintzilariek. Lan saioa Aiaraldeko zein Bruselako irrintzilarien ahots-performance batekin bukatuko da, urriaren 15ean egingo duten Irrintzien azpitik emanaldian.
Gainera, azaroaren 2tik 4ra bitartean eskualdeko lau irrintzilari Bruselara joango dira YouYou Group proiektua bertatik bertara ezagutzeko eta, besteak beste, Irrintzien azpitik bertan erakusteko.
Horrez gain, proiektua komunitate osora zabaltzeko, ikasturtean zehar ikus-entzunezkoen proiekzioak, afariak eta emanaldiak antolatzeko asmoa adierazi du Aiaraldeko Kultur Faktoriak. Ekintza horien inguruko informazio gehiago jasotzeko YouYou-Irrintzi ataria bisitatu dezakete interesdunek, Kultur Faktoriako webgunean.