Atzo jakinarazi zuten La sociedad de la nieve izango dela Espainiako estatuko ordezkaria Oscar Sarietan. Juan Antonio Bayonaren filmak ekoizpen gehiagotan landutako gertakaria islatu du Netflixentzat sortutako lanean, hau da, Urugayko errugby talde batek Andeetan izandako hegazkin istripua, Alive! pelikulan ere jorratutakoa, esaterako.
Bayonaren hautaketarekin bi zuzendari euskaldun geratu dira sarien hurrengo fasetik kanpo, Esti Urresola eta Victor Erice.
Urresolak berak adierazi zuen azken hautagaien artean egotea nahikoa zela berarentzat. Izan ere, ezin da ahaztu laudioarraren proiektua zinema independentea dela eta oso urrun iristen ari dela aurrekontu apalarekin.
Gainera, nazioarteko sari gehiago eskuratzeko aukera dauka Urresolak, eta lasterketa horretan Victor Ericerekin egongo da berriro, nor baino nor. Zehazki, Europako Zinema Akademiako aitortzetan izango da. Urresolarentzat ohorea izan da 18 hautatuen artean egotea, Victor Erice barne.
Horrez gain, laudioarrak izendapen gehiago metatu ditu. Aitortza horiek Europako Parlamentuenak dira eta balio europarren unibertsaltasuna eta aniztasuna islatzen duten filmeek jasotzen dituzte. Urresolarekin batera badago Aki Kaurismaki ere, besteak beste.
Zinemaldian berehala
Aipatutakoaz gain, 20.000 especies de abejas pelikulak erronka berria izango du bihar bertan, Donostiako Zinemaldiko Zinemira Saila inauguratuko baitu.
Halaber, 150.000 ikusle erakarri eta gero Espainiako estatuko zinemetara, edukia plataformetan ikusgai dago abuztutik eta DVD eta Blu Ray euskarrietan ere badago irailaren 12tik.