Leire Sanjurjo eta Iratxe Bilbaoren lana Kulturlab ekimenaren Bigarren Azala proiektu artistikoko 15. esku-hartzea da. Bigarren Azalarekin Kultulab artista laudioarren sormen lanen erakusleiho izan da Zumalakarregi etorbidean 2022ko uztailetik eta 2023ko uztailetik Zubiko Malekoian. Helburua, herrian “kultura garaikideak balioetsi, ikusarazi eta ezagutaraztea” da eta arte diziplina guztietara zabalik daude, nahiz eta beti hormaren gaineko irudi estatikoak izan behar diren muralaren oinarri.
Iazko udazkenean Patas de Gansa kolektiboa sortu zuten Leire Sanjurjo laudioarrak eta Iratxe Bilbao mungiarrak. Beren sormen-nahiak “kolektiboki” garatzeko grinak bultzatu zituen horra, dantza “mundua ezagutzeko, ulertzeko eta zalantzan jartzeko” tresna gisa ulertzen baitute.
Larriak Azpian izeneko dantza esperimentazio lanaren bidez, emakumeek egiten zuten lanari balioa eman nahi diete, bai eta latsarriak emakumeen elkargune eta arnasgune izateko betetzen zuten funtzioa aztertu ere. Asmoa dantza garaikidea eta tradizioa uztartuko dituen kaleko pieza bat sortzea da, herrietako plaza, parke eta erreka txokoetara eraman asmoz. Lan zamaren eta zapalkuntzaren inguruan eta kolektiboaren indarraz ikertzen eta hausnartzen ari da dantza bikotea.
Zumalakarregi etorbidean jarritako muralari dagokionez, ekainean Aiaraldea Ekintzen Faktorian egindako interpretazioaren hiru irudi erakusten ditu. Bertan egindako egonaldiaren barruan, publikoari piezaren bertsio bat erakutsi zioten, sormen prozesuaren parte, eta hortik ateratako irudiekin osatu dute orain Laudioko kale nagusia janzten duen horma-azala. Irailaren 5ean jarri zuten Larrian Azpian lana Zumalakarregi etorbidean eta hilaren amaiera bitarte ikus daiteke bertan.
Larriak azpian - esperimentazio fasea - from Patas de Gansa on Vimeo.