Donostia Zinemaldiaren 71. ediziotik bi sari berrirekin itzuli da Esti Urresola, eta 20.000 especies de abejas filmak aitortzak pilatzen jarraitzen du. Donostiako jaialdiko Zinemira saila inauguratu zuen Urresolaren lehen lan luzeak iragan irailaren 22an, eta Sebastiane Saria jaso du bertan.
Sebastiane Sariak Zinemaldia iraun bitartean LGTBI+ komunitatearen balio eta errealitatea hobekien islatzen duen filmari eskainitako aitortza da. GEHITU elkarteko kideek eta Arantxa Echevarria eta Jose Mari Goenaga zinemagileek osatu dute epaimahaia, eta Urresolaren zinta aukeratu dute, "trans haurtzaroek eta haien familiek egiten duten trantsizioa argi eta garbi erakusten duelako, gu guztiontzat enpatiazko erreferenteak eta loturak sortuz".
Bigarren sari bat ere ekarri du besapean Urresolak Donostiatik. EITB Saria: Egile Berriak aitortza jaso du zinemagile laudioarrak, 20.000 especies de abejas filmak nazioarteko zinema-jaialdietan izan duen proiekzioagatik.
Nazioarteko aitortza gehiago
Euskal Herritik kanpo, bi sari gehiago eskuratu ditu Urresolaren lanak azken astean. Helsinkiko Nazioarteko Zinemaldiaren 36. edizioko publikoaren saria jaso du; eta baita Seulgo Haur Zinemaldiaren 11. edizioko film luzeen nazioarteko saileko sari nagusia ere.
Epe laburrean beste bi nominazio jaso ditu 20.000 especies de abejas-ek. Alde batetik Europako Ikusleen Zinemaren 2024ko LUX Saria jasotzeko aukerak ditu; "Europako Parlamentuak bultzatutako saria, Europako balioen unibertsaltasuna, Europako kulturaren aniztasuna edo Europar Batasunaren eraikitze-prozesuari buruzko gaiak erakusten dituzten filmak aintzatesteko".
Bestetik Europako Zinema Akademiaren sarietan ere hautatua izan da, beste18 lanen artean.
"Zinema independentearen fenomeno berria"
Urresolaren 20.000 especies de abejas "zinema independentearen fenomeno berria" bilakatu dela nabarmendu du filmaren ekoiztetxeak. Estreinalditik 150.000 ikusle izan ditu Espainiako Estatuko zinema aretoetan, eta beste 28 herrialdeetan proiektatua izan da. Orain plataforma digital desberdinetan ere ikus daiteke.
Berlingo zinema jaialdian hasi zuen nazioarteko aitortzen segida, Sofia Otero gazteak interpretazio onenaren zilarrezko hartza irabazi zuenean. Ordutik jaialdi askotatik igaro da sarien zerrenda handituz. Berriki, Espainiako Estatua Oscar Sarietan ordezkatzeko atarian geratu da.