Pasa den astean X sare sozialean (lehen Twitter izenekoa) partekatutako bideoak polemika piztu zuen. Klip horretan 'Konejo' Zopilotes Txirriaos taldeko abeslariak gogor kritikatzen eta iraintzen zuen Julian Iantzi kontzertu batean, beste abesti bat jo baino lehen.
El cantante de Los Zopilotes Txirriaos dedica una canción a Julian Iantzi:
— Gure bideoak (@GureBideoak) September 28, 2023
pic.twitter.com/PpLTEeoRXg
Bere hitzartzean, abeslari nafarrak "arratoi" deitu zion Iantziri eta, besteak beste, adierazi zuen Egin egunkariaren kontrako kanpainan parte hartu zuela, EGIko kide gisa -erakundea propio aipatu gabe-, Auzitegi Nazionalak hedabidea itxi baino lehen. Zehazki, EGIk egunkariaren kontrako kanpaina egin zuen 1991n eta Iantzi bera agertu zen prentsaurreko batean horren harira.
Zazpi urte geroago, Baltasar Garzon epaileak Egin ixteko agindua eman zuen. Konejok aipatu zuen itxierak atxiloketak eta espetxealdiak ekarri zituela, Pablo Gorostiagarena, besteak beste.
"Jendeila hau soberan dago" eta "lur azpian egon behar litzateke" esanda, kontzertuarekin jarritu zuen abeslariak eta publikoak ere ez zion aparteko garrantzirik eman hitzartzeari.
Latiorroko Jaietan grabatu zen bideoa
Berez, hautsak harrotu dituen bideoa Latiorroko Jaietan grabatu zuten eta pasadizoak ez zuen oihartzun berezirik izan herrian bertan, baina sare sozialetan zabaldu ondoren, zeresan handia eman du.
Besteak beste, Itxaso Atutxa Bizkaiko Buru Batzarreko presidenteak gertakaria salatu zuen eta "fanatismotzat" jo zuen.
Epaitegian amaituko du auziak
Edonola ere, hitzartzeak anekdota hutsaren egoera gainditu du eta bideoa hamaika hedabidetan agertu eta gero (bereziki eskuin politikoari lotuta daudenetan), Julian Iantziren erantzuna izan du.
Aurkezleak iragarri du sare sozialen bidez salaketa jarriko duela epaitegian eta bere kontrako mehatxu gisa hartu ditu abeslariaren hitzak.
Jarraitzaile batek argitaratua
Sare sozialetako hainbat erabiltzailek azpimarratu dute abeslariaren hitzartzeak berriro piztu duela adierazpen askatasunaren mugen beharra dagoen edo ez, baina nabarmentzekoa da polemikaren iturburua, berez, ez dela izan Zopilotes Txirriaosen abeslariaren jarrera salatu duen inor, bere jarraitzaile bat baizik. Hain zuzen, @GZhiritarra profilak zabaldu zuen bideoa Konejoren jarrera goraipatuta. Laudorioak, ordea, arazoak ekarri dizkio abeslariari.