Sagar Egunaren edizio berria egingo du Kukutxe Elkarteak urriaren 7an. 2019an ospatu zen azkenekoz sagarrak eta sagardoak Aiaraldean utzitako ondarea berreskuratzea xede duen festa. Aurtengo edizioak aurrekoen eskema berdina jarraituko du ere.
10:00etan hasiko dute jaia Aldai Plazako artisau eta baserritar azokaren irekierarekin. Horrekin batera, sagardoa egiteko erabilitako antzinako tresneriaren erakusketa ere egingo dute. Ordu horretan jaiaren protagonista izango diren sagarrak aurkeztu eta sagar zukua ekoizteari ekingo diote, eskuzko teknikak zein teknika mekanikoak erabiliz.
Sagar tarta gastronomi lehiaketa izango da aurtengo edizioko ekintza nagusietako bat. Parte hartu nahi duen orok 12:00etatik 12:30etara izango du tartak aurkezteko tartea. Horrez gain, haurrentzako jolasak eta sagar garrafa dastatzea ere egingo dituzte.
Sagar-jotze desafioa
Ikusmira handiena sortuko duen ekintza, ordea, sagar-jotze desafioa izango da. Bikote parte hartzaileak sagar-jotzean eta prentsatzean aritu beharko dira, ahalik eta sagar zuku gehien ekoizteko. Desafioan parte hartzeko 12:00etatik aurrera eman ahalko da izena, azoka esparruan bertan.