Laudioko EAJk prentsa oharra plazaratu du egungo udal gobernu taldeari egozteko 1.800.000 euroko Next Generation funtsen dirulaguntzaren itzulketa. Izan ere, jeltzaleek defendatu dute Abasto plazako proiektua ondo bideratuta utzi zutela eta EH Bilduren eta Omniaren utzikeriaren ondorioa izan dela funts europarrak itzuli beharra.
Halaber, EAJk nabarmendu du Europak emandako dirulaguntza osoa bueltatu beharko dutela, eta ez bakarrik plazako birgaitzeari dagokiona: "%90 hornidura-merkatua birgaitzeko obretarako da, eta gainerakoa merkataritza-proiektuetarako, 30 txiki inguru; horietako batzuk esleituta daude, baita martxan ere. Ondorioz, Udalak dirulaguntza osoa itzuli behar du 40.000 euro inguruko interesekin, Europako funtsetatik jasotako zenbateko guztia itzuli behar baita (1.800.000 euro), eta ez birgaitze-obrari dagokiona bakarrik".
Bere kudeaketa defendatzeko, EAJk adierazi du aurreko agintaldian obren proiektuaren berrikuspena kontratatu zuela maiatzean, eta dokumentazio guztia entregatu ziola gobernu talde berriari, ekainean. Era berean, legegintzaldi honetan behin betiko proiektua onartu zen, irailean zehazki. Ander Añibarrok honakoa erantsi du: "Ikasten ari ziren bitartean hilabeteak pasatzen utzi dituzte, denbora gainean izan arte".
Omniaren adierazpenak
EH Bilduk eta Omniak osatzen duten udal gobernu taldeak atzo eskaini zuten prentsaurrekoa plazan bertan eta honakoa azaldu zuen: "Europako funtsa jasotzeko ezarritako epeek ez dute bideragarri egiten birgaitze proiektua horrela finantzatzea. Dirulaguntza deialdiaren arabera, 2024ko ekainerako lanen %60 gauzatua egon beharko lirateke. Horretarako, ordea, proiektua aurtengo ekainean egon beharko luke lizitatua eta lanak abuztutik abiatuak".
Halaber, Omniak, bere kabuz, sare sozialetan zabaldu zuen EAJren eta PSE-EEren kudeaketak ez duela ahalbidetu epeak betetzea. Halaber, talde independenteak azpimarratu zuen tokiko merkatarien garrantzia eta proiektuarekin aurrera egin beharra. Hori bai, "dirulaguntzarik jaso behar ez izateak aukera emango digu proiektuan egin daitezkeen hobekuntzei buruzko hausnarketa egiteko, merkatariekin, lehen sektorearekin eta eragindako bizilagunekin parte hartu ahal izango baita. Era berean, hasierako ideian sartzen ez diren elementu historiko batzuk kontserbatzeko alternatibak aztertuko dira", argitu du Omniak.