Urriaren 13, 14 eta 15ean 21 urte azpiko Karate Liga Nazionala jokatuko da Laudioko Granja kiroldegian. Gaur egin dute ekitaldiaren aurkezpena, Laudioko Udalbatza aretoan. Ainize Gastaka Laudioko alkateak nabarmendu du "ohorea" dela "tamaina horretako kirol ekitaldi baten anfitrioia izatea". Zentzu berdinean mintzatu da ere Jose Manuel Colas, Karateko Euskal Federazioko presidentea: "plazera da horrelako ekitaldiak jasotzea federazio bezala. Euskadiko 11 klub arituko dira lehian, eta estatu osoko 100 talde baino gehiago guztira".
Guztira 1.000 kirolari baino gehiago neurtuko dira Granja kiroldegian txapelketak iraungo dituen hiru egunetan. Colasek nabarmendu du maila oso altuko karatekak etorriko direla Laudiora: "Oso momentu onean daude Laudion lehiatuko diren kirolarietako asko. Bi aste barru Munduko txapelketara joango dira, eta honezkero oso maila altua daukate".
Beteranoak eta para-karatea
21 urte azpiko liga ez ezik, beste bi kategoria ere egongo dira asteburuko hitzorduan: beteranoen kategoria eta para-karatekoa. Beteranoen bigarren liga izango da Laudiokoa eta, Jose Manuel Colasek azpimarratu duenez, "egunez egun garrantzia handiagoa duen kategoria da". Para-karateari ere garrantzia berezia eman nahi dizkiote federazioek. Bai beteranoek eta baita para-karatean arituko diren kirolariek ostiralean jokatuko dute, eta beraiena izango da txapelketa inauguratzearen ardura.
Ostiralean 16.00etan hasiko dira norgehiagokak, eta estatuko kirolari beterano onenak bertaratuko dira Laudiora, tartean munduko txapeldunak izandakoak ere.
Gizonezkoen eta emakumezkoen ligak
Larunbatean 21 urte azpikoen gizonezkoen liga jokatuko da. 8:30ean abiatuko dira norgehiagokak, eta streaming bidez jarraitzeko aukera egongo da. Halaber, 17:30etatik aurrera finalak jokatuko dira eta hauek Teledeporte eta La Liga telebista kateetatik transmitituko dira zuzenean.
Igandean Iberdrola Ligako emakumezkoen txanda izango da. Larunbatean bezala, 8:30ean abiatuko da txapelketa eta finalak 12:30ean hastea aurreikusi dute.
Herrian eragina
Kirol ekitaldiak herrian eragin nabaria izatea espero dute federazioek zein udal ordezkariek. Karatea Laudion berriro indartzeko baliatu nahi dute hitzordu garrantzitsu hau, eta deia luzatu diete herritarrei Granja kiroldegia betetzeko. Nerea Gonzalez kirol zinegotziak ostalariei ere egin die deia, Laudiora etorriko diren milaka lagunei harrera beroa egiteko.