Atzo egin zen Autoglas-Glavistaren Enplegua Erregulatzeko Espedientearen lehen bilera. ELA sindikatuak salatu duenez, konkurtso administrazioa eta enpresa batzordea baino ez ziren bertaratu batzarrera. “Hau da, ez dira bertaratu ez Parter Capital, 2020an Autoglas erosi zuen putre funtsa, ezta Guardian multinazionala ere, Laudioko Autoglas lantegia behin betiko ixten saiatzen ari dena, eta, beraz, enpresaren egoeraren erantzule nagusia dena”, salatu du sindikatuak.
Bi enpresa horiek espedientearen prozesuan parte hartzea eskatu zuen ELAk bileran. “Eskaera hori Gasteizko Merkataritza Arloko Epaitegian ere izapidetu da, laguntza judizial baten bidez”. Horrez gain, dokumentazio gehiago ere eskatu du sindikatuak, “konkurtsoan zehar eman ez zaiola” argudiatuta. “Epaitegiak ez du oraindik ebazpenik eman. Hori dela eta, ELAk bileran eskatu du kontsultaldia etetea, epaitegiak erabakia hartu arte. Hala ere, konkurtso administrazioak ez du onartu”.
Autoglas-Glavistako langileek, euren aldetik, elkarretaratzea egin zuten atzo Bilbon, Parter Capital ordezkatzen duen aholkularitzaren aurrean, “industria proiektu bat eta lanpostu guztien defentsa eskatzeko”.