Buru osasuna eskubide unibertsala dela aldarrikatu nahi izan dute gaur goizean La Granja kiroldegian Asasam elkarteko kideek eta La Milagrosa ikastetxeko ikasleek jokatu duten lagunarteko areto-futbol partidan. Buru Osasunaren Nazioarteko Egunaren testuinguruan antolaturiko jarduera izan da, eta ezinbesteko hitzordu bilakatu da azken urteetan.
Buru Osasunaren Aldeko IV. Ibilaldia
Dena den, Buru Osasunaren Aldeko Ibilaldi Soziala izango da Asasamek prestaturiko programaren plater nagusia. Urriaren 22an egingo dute ekimenaren IV. edizioa. 2019an martxa lehendabiziko aldiz antolatu zenetik, urtez urte arrakasta handiagoa izan du hitzorduak, eta pandemiak ere ez zuen ospakizuna eten.
Urtero bezala, aurten ere, Amurrioko Juan Urrutiatik eta Laudioko Herriko plazatik abiatuko dira zutabeak 10:00etan, Luiaondon bat egiteko. 6,5 kilometroko ibilbidea izango da orotara, Nerbioiko Parke Lineala zeharkatuz.
Izen emateak 3 euroko kostua izango du, eta egunean bertan egin ahalko da Laudioko eta Amurrioko irteera puntuetan. Azaldu dutenez, parte hartzaile orok jasoko du saria.
Egitaraua ixteko, Maria Belen Andres psikologoak hitzaldia eskainiko du urriaren 25ean Laudioko Kultur Etxeko Arraño gelan, 18:00etan.