Urriaren 28an Cosecha del 48 elkarteko kideek txangoa egingo dute Arabako Lautadan barrena. "Laudion askotan ez dugu gure burua arabartzat jotzen eta gehiago ezagutzen dugu Bizkaia. Hortaz, iruditu zitzaigun ideia ona irteera egitea Araba ezagutzeko", adierazi dio elkarteko kideetako batek Aiaraldea Komunikabideari.
Horretarako, urriaren 28an Laudio Institutuko autobus geltokitik abiatuko dira bidaiariak 9:00etan. Handik Estibalizera joko dute santutegia bisitatzeko eta gero Barkamenaren Atetik igaroko dira. Lehen tarte hori Juan Carlos Pinedo apaiz ohiak gidatuko du.
Ondoren, Erdi Aroko Araba elkartearekin batuko dira zenbait tokitara joateko, adibidez, Sorginetxeko Trikuharrira. Bazkaria 'El Gordo' jatetxean izango da, Aguraingo herrigunean, eta otorduaren ostean Gasteizko bidea hartuko dute.
Arabako hiriburuan 20:00ak arte egongo dira, bakoitza bere kaxara, eta 21:00etan Laudiora heltzea espero dute. Interesdunek 48 euro ordaindu beharko dituzte Laboral Kutxako ES 35 3035 0045 2304 5116 9796 kontu korrontean.