Azaroaren 4an Laudioko I. Eskalada Txapelketa egongo da jokoan Latiorroko rokodromoan. Edonola ere, lehiaketak baditu bestelako helburuak: kirol gutxituak ikusaraztea, zaletasuna sustatzea...
Horregatik, lehiakortasuna ez da jarduera osoaren ardatza izango. Hain zuzen, 10:00etatik aurrera umeak izango dira protagonistak eta jolasen bitartez eskaladara hurbiltzeko aukera emango dute Haitzetan Gora Mendi Taldeko kideek.
Antolatzaileek aipatu dute euskara erdigunean jarriko dutela eta haurrentzako mokadua eta oparien zozketa egongo direla. Horrez gain, sortu berri duten eskalada eskolako talde argazkia egingo dute.
Lehiaketa arratsaldez
Arratsaldean, ordea, 14 urtetik gorako eskalatzaileek aukera izango dute txapelketan hartzeko. Izena eman beharra dago urriaren 23an edo lehenago. 5 euro balioko du inskripzioak eta kamiseta oparituko dute.
Probak bi zati izango ditu. 15:30etik aurrera finalean sailkatzeko erronkaren txanda helduko da. Parte hartzaileek hamabi bloke gainditu beharko dituzte eta puntuazio onenak eskuratzen duten hiru gizonezko eta hiru emakumezko aurrez aurre egongo dira 18:30etatik aurrera. Finalean hiru bloke eta soka ibilbidea egin beharko dituzte finalistek. 19:40ean hasiko da bi kategorien sari banaketa.
Interesdunek aintzat hartu behar dute 60 kirolari baino ez dituela onartuko antolakuntzak, hortaz, hemen bete dezakete inskripzioa.