Bisita berezia jaso zuen Faktoriak iragan ostiralean Garabide Elkarteak sustatutako Aditu ikastaroan parte hartzen ari diren kide indigenak Laudiora bertaratu ziren kooperatiba elkartea, Faktoria eta bere altzoan abian jarritako proiektuak bertatik bertara ezagutzeko helburuarekin. Mundu osoko hamahiru hizkuntza gutxituetako 16 ordezkari bertaratu ziren Laudioko Industrialdean dagoen pabilioira, Garabideko kideekin batera.
Bisita gidatuari ekin aurretik, tokiko produktuez kozinatutako bazkariaz gozatzeko aukera izan zuten. Bazkalostean, Faktoriako azpiegitura eta txoko bakoitzaren atzean dauden proiektuak eta ekimenak ezagutu zituzten.
Bazkalorduan, Laudiora hurbildu gara eta sabela tokiko produktuekin bete ondoren, Aiaraldea Ekintzen Faktoriako kideek beren egoitza erakutsi digute. Tokikotasunetik euskara(z) bizitzeko komunitatearen beharrei erantzuten dizkien tresnak nola sortzen dituzten ikusi dugu. pic.twitter.com/d03PSemqFI
— Garabide (@garabide) October 28, 2023
Hizkuntzak biziberritzeko formazio programa
Garabide elkarteak hainbat ikasturtez garatu duen formazio programa da Aditu. Hain zuzen ere, herri indigenetako hizkuntza ekintzaileei hizkuntzen biziberritzerako formazioa eskaintzeaz gain, aukera eskaintzen die baita ere euskararen berreskurapen prozesua bultzatzeko alor desberdinetan garatutako proiektu eta esperientziak aurrez aurre ezagutzeko. Hizkuntza aktibistak trebatzea da, funtsean, formakuntzaren helburu nagusia.
Formazioaren azken edizioa urriaren 2an abiatu zuten eta datorren ostegunera arte (azaroak 9) luzatuko da. Azken hilabetean, Faktoria ez ezik, Euskaltzaindia, Bilboko Kafe Antzokia, AEK, Elhuyar edota Kanaldude komunikabidea ere bisitatu dituzte, beste askoren artean.
Lankidetza Garabiderekin
Aiaraldea Komunikabideak lankidetza hitzarmena du sinatua Garabide Elkartearekin. Azken lau urteetan Komunikabideko eta Faktoriako zenbait kide Ekuadorreko Imababura eskualdean izan dira, Kitxuaren Biziberritze Estrategietako Nazioarteko Diplomaturan parte hartzeko.
Euskal Herriko Garabide Elkarteak eta Ekuadorreko Sysari eta AJKI erakundeek elkarlanean garatutako diplomatura da hori. Hiru topaketa garatu dituzte honezkero, eta helburu nagusia kitxua hizkuntza biziberritzeko aktibisten sarea osatzea eta formatzea da; soziolinguistikako ezagutza orokorretik hizkuntzaren aktibazioa bultzatuko duten proiektu zehatzak garatzeraino.
Aiaraldea Komunikabideari dagokionean, Ekuador iparraldeko kitxua hiztunek garatutako proiektu komunikatiboekin elkarlanean aritzea eta hauei aholkularitza eskaintzea izan da diplomaturaren barruko eginkizun nagusia.