Arabako Kopako finalera iritsi dira Altzarrate Kirol Elkarteko neskak, eta urte bakarrean bigarren aldiz izan daitezke Arabako txapeldun, azken denboraldiko emaitza errepikatuz. Larunbatean -azaroak 4- Lakua Arriagaren aurka neurtuko dira, 16:30ean Murgiako futbol zelaian.
Finalaurreko zaila
Finalerako bidea ez da erraza izan Altzarraterentzat. Finalerdietan Hauritz Kirol Klub gasteiztarra izan dute aurrez aurre, eta joan-etorriko bi partidak "gogorrak" izan direla aitortu du Irune Egiguren entrenatzaileak. Asteburuan Gasteizen jokatu zuten azken partida, eta norgehiagoka horretara Laudion bana berdinduta iritsi ziren bi taldeak. "Hasieratik joan ginen golaren bila, bagenekien markagailua hutsean geratuz gero finaletik kanpo geratuko ginela".
Hainbeste borrokatutako gola, ordea, ez zen berehala iritsi. Partidaren 75. minutuan jokalari bat gutxiagorekin geratu zen Altzarrate, baina horrek ez zuen laudioarren ahalegina eten, eta norgehiagoka amaitzeko hamar minuturen faltan gola sartzea lortu zuten, penalti bidez; birtualki finalean ziren. Hauskaitzek errealitatera bueltatu zituen Altzarrateko neskak; partida amaitzeko minutu baten faltan gola sartu zuten aurkariek. Tentsio handiko minutuak izan zirela azaldu du Egigurenek, hainbat jokalarik eta Hauskaitzeko entrenatzaileak txartel gorria jaso zuten.
Penaltietan ebatzi zen finala nork jokatuko. Altzarratek ez zuen hutsik egin lehenengo tandan; Hauskitzek, ordea, bai. Penaltietan egindako hutsegite horrek finalean jarri ditu neska laudioarrak.